ബെംഗളൂരു : റോയല്‍ ചലഞ്ചേഴ്‌സ് ബെംഗളൂരുവിനോട് തോല്‍വി വഴങ്ങിയതോടെ ഐപിഎല്‍ 17-ാം പതിപ്പില്‍ നിന്നും നിലവിലെ ചാമ്പ്യന്മാരായ ചെന്നൈ സൂപ്പര്‍ കിങ്‌സ് പുറത്തായിരുന്നു. മുന്‍ നായകന്‍ എംഎസ്‌ ധോണി ഇനിയൊരു സീസണില്‍ കൂടി ചെന്നൈയുടെ മഞ്ഞക്കുപ്പായം അണിയുമോയെന്ന കാര്യത്തില്‍ ഇതേവരെ വ്യക്തത വന്നിട്ടില്ല. എന്നാല്‍ ബെംഗളൂരുവിനെതിരായ തോല്‍വിക്ക് പിന്നാലെയുള്ള വെറ്ററന്‍ താരത്തിന്‍റെ പ്രവര്‍ത്തിയില്‍ കടുത്ത വിമര്‍ശനം ഉയര്‍ന്നിരിക്കുകയാണ്.
ബെംഗളൂരു താരങ്ങള്‍ക്ക് ഹസ്‌തദാനം നല്‍കാന്‍ ധോണി തയ്യാറാവാത്തതാണ് വിമര്‍ശനത്തിന് വഴിയൊരുക്കിയിരിക്കുന്നത്. മത്സര ശേഷം ചെന്നൈ താരങ്ങൾ ഡ്രസ്സിങ് റൂമില്‍ നിന്നും ഗ്രൗണ്ടിലേക്ക് ഇറങ്ങി വന്നപ്പോള്‍ മുന്നിലുണ്ടായിരുന്ന ധോണി ബെംഗളൂരു താരങ്ങള്‍ക്ക് കൈകൊടുക്കാന്‍ കാത്തുനിന്നില്ല. തിരികെ മടങ്ങുമ്പോള്‍ ബെംഗളൂരുവിന്‍റെ സപ്പോർട്ടിങ് സ്റ്റാഫുകള്‍ക്ക് താരം കൈകൊടുക്കുകയും ചെയ്‌തു. ഇതിന്‍റെ വീഡിയോ സോഷ്യല്‍ മീഡിയയില്‍ വൈറലാണ്.
ഒരു സീനിയര്‍ താരത്തില്‍ നിന്നും ഇത്തരത്തിലൊരു പ്രവര്‍ത്തി ഉണ്ടാവാന്‍ പാടില്ലെന്നാണ് ആരാധകര്‍ പറയുന്നത്. അതേസമയം മത്സരത്തില്‍ ചെറിയ തോല്‍വി വഴങ്ങിയാലും റണ്‍റേറ്റിന്‍റെ അടിസ്ഥാനത്തില്‍ ചെന്നൈക്ക് അവസാന നാലിലേക്ക് കടക്കാന്‍ അവസരമുണ്ടായിരുന്നു. മത്സരത്തില്‍ ടോസ് നഷ്‌ടപ്പെട്ട് ആദ്യം ബാറ്റ് ചെയ്യാന്‍ ഇറങ്ങിയ ബെംഗളൂരു 18 റണ്‍സില്‍ താഴെയുള്ള റണ്‍ വ്യത്യാസത്തില്‍ ജയിച്ചാലായിരുന്നു ചെന്നൈയ്ക്ക്‌ പ്ലേഓഫിലേക്ക് കടക്കാന്‍ കഴിയുക.
എന്നാല്‍ സ്വന്തം തട്ടകമായ ചിന്നസ്വാമി സ്റ്റേഡിയത്തില്‍ നടന്ന മത്സരത്തില്‍ 27 റണ്‍സിന് വിജയിക്കാന്‍ ബെംഗളൂരുവിന് കഴിഞ്ഞു. ആദ്യം ബാറ്റ് ചെയ്‌ത ബെംഗളൂരു ഫാഫ് ഡുപ്ലെസിസ് (39 പന്തില്‍ 54), വിരാട് കോലി (29 പന്തില്‍ 47), രജത് പടിദാര്‍ (23 പന്തില്‍ 41) എന്നിവരുടെ മികവില്‍ നിശ്ചിത ഓവറില്‍ അഞ്ച് വിക്കറ്റ് നഷ്‌ടത്തില്‍ 218 റണ്‍സായിരുന്നു നേടിയിരുന്നത്. മറുപടിക്ക് ഇറങ്ങിയ ചെന്നൈക്ക് 20 ഓവറില്‍ ഏഴ്‌ വിക്കറ്റിന് 191 റണ്‍സെടുക്കാനേ സാധിച്ചുള്ളൂ. 37 പന്തില്‍ 61 റണ്‍സെടുത്ത രചിന്‍ രവീന്ദ്ര ടോപ്‌ സ്‌കോററായി. രവീന്ദ്ര ജഡേജ 22 പന്തില്‍ പുറത്താവാതെ 42 റണ്‍സെടുത്തു.
ധോണിയും ജഡേജയും ക്രീസില്‍ നില്‍ക്കെ പ്ലേ ഓഫിന് ആവശ്യമായ റണ്‍റേറ്റ് നിലനിര്‍ത്താമെന്ന പ്രതീക്ഷ ചെന്നൈ സൂപ്പര്‍ കിങ്‌സിനുണ്ടായിരുന്നു. അവസാന രണ്ട് ഓവറില്‍ 35 റണ്‍സായിരുന്നു ഇതിനായി ടീമിന് വേണ്ടിയിരുന്നത്. 19-ാം ഓവറില്‍ ധോണിയും ജഡേജയും ചേര്‍ന്ന് 18 റണ്‍സ് നേടി. ഇതോടെ അവസാന ഓവറില്‍ 17 റണ്‍സായിരുന്നു ചെന്നൈക്ക് വേണ്ടിയിരുന്നത്.
20 ഓവറിന്‍റെ ആദ്യ പന്തില്‍ കൂറ്റന്‍ സിക്‌സര്‍ പറത്തിയ ധോണി തൊട്ടടുത്ത പന്തില്‍ പുറത്തായി. 13 പന്തില്‍ 25 റണ്‍സായിരുന്നു താരം നേടിയത്. പിന്നീടുള്ള നാല് പന്തുകളില്‍ വെറും ഒരു റണ്‍സ് മാത്രമാണ് ചെന്നൈക്ക് നേടാന്‍ കഴിഞ്ഞത്.
