വിശാഖപട്ടണം : നീണ്ട കാത്തിരിപ്പിനൊടുവിലാണ് ആഭ്യന്തര ക്രിക്കറ്റിലെ ഏറ്റവും മികച്ച ബാറ്റര്‍മാരില്‍ ഒരാളായ സര്‍ഫറാസ് ഖാന് (Sarfaraz Khan) ഇന്ത്യന്‍ സീനിയര്‍ ടീമിലേക്ക് ക്ഷണം ലഭിച്ചിരിക്കുന്നത്. 26കാരനായ സര്‍ഫറാസ് ഖാനെ തഴയുന്നതില്‍ നിരവധി പ്രാവശ്യം ആരാധകരുടെ ചീത്തവിളി കേട്ട ശേഷമാണ് ഇപ്പോള്‍ താരത്തെ ടീമിലെടുക്കാന്‍ ബിസിസിഐയുടെ തീരുമാനം. ഇംഗ്ലണ്ടിനെതിരായ ടെസ്റ്റ് പരമ്പരയില്‍ വിശാഖപട്ടണത്ത് നടക്കാനിരിക്കുന്ന രണ്ടാം മത്സരത്തിനുള്ള ഇന്ത്യന്‍ സ്ക്വാഡിലേക്കാണ് മുംബൈ ബാറ്ററായ സര്‍ഫറാസ് ഖാനെയും പരിഗണിച്ചിരിക്കുന്നത്.
സീനിയര്‍ താരം കെഎല്‍ രാഹുല്‍ പരിക്കേറ്റ് പുറത്തായ സാഹചര്യത്തിലാണ് സര്‍ഫറാസ് ഖാന് ഇന്ത്യന്‍ സീനിയര്‍ ടീമിലേക്ക് ക്ഷണം ലഭിച്ചത്. ഫെബ്രുവരി രണ്ടിന് വിശാഖപട്ടണത്താണ് ഇന്ത്യ ഇംഗ്ലണ്ട് പരമ്പരയിലെ രണ്ടാം മത്സരം ആരംഭിക്കുന്നത് (India vs England 2nd Test). സര്‍ഫറാസിനൊപ്പം സൗരഭ് കുമാര്‍, വാഷിങ്‌ടണ്‍ സുന്ദര്‍ എന്നിവരും രണ്ടാം ടെസ്റ്റിനുള്ള സ്ക്വാഡില്‍ ഇടം പിടിച്ചിട്ടുണ്ട്.
വിശാഖപട്ടണത്ത് ആരിറങ്ങും...? : ഫസ്റ്റ് ക്ലാസ് ക്രിക്കറ്റില്‍ അരങ്ങേറി പത്ത് വര്‍ഷങ്ങള്‍ക്കിപ്പുറമാണ് സര്‍ഫറാസ് ഖാന് ആദ്യമായി ഇന്ത്യയുടെ സീനിയര്‍ ടീമിലേക്ക് എത്തുന്നത്. ഇത്രയും നാള്‍ നീണ്ട കാത്തിരിപ്പിനൊടുവില്‍ ടീമിലേക്ക് ക്ഷണം ലഭിച്ച സര്‍ഫറാസ് വിശാഖപട്ടണത്ത് നടക്കുന്ന മത്സരത്തില്‍ ഇന്ത്യന്‍ പ്ലെയിങ് ഇലവനില്‍ സ്ഥാനം കണ്ടെത്തുമോ എന്നാണ് ആരാധകര്‍ ഉറ്റുനോക്കുന്നത്. കെഎല്‍ രാഹുലിന്‍റെ പകരക്കാരനായി എത്തിയ സര്‍ഫറാസ് രണ്ടാം മത്സരത്തില്‍ രാഹുലിന്‍റെ ബാറ്റിങ് പൊസിഷനില്‍ കളിക്കാനിറങ്ങുമോ എന്നറിയാനുള്ള കാത്തിരിപ്പിലാണ് ആരാധകരും.
ദിവസങ്ങള്‍ക്ക് മുന്‍പ് ഇംഗ്ലണ്ട് ലയണ്‍സിനെതിരെ നടന്ന അനൗദ്യോഗിക ടെസ്റ്റില്‍ 160 പന്തില്‍ നിന്നും 161 റണ്‍സായിരുന്നു സര്‍ഫറാസ് നേടിയത്. ഇത്തരത്തില്‍ തകര്‍പ്പന്‍ പ്രകടനം നടത്തിയിട്ടും പരമ്പരയില്‍ ആദ്യ രണ്ട് മത്സരങ്ങളില്‍ നിന്നും വിട്ടുനിന്ന വിരാട് കോലിയുടെ പകരക്കാരനായി രജത് പടിദാറിനെയായിരുന്നു (Rajat Patidar) ബിസിസിഐ ടീമിലേക്ക് പരിഗണിച്ചത്. സെലക്‌ടര്‍മാരുടെ ഈ തീരുമാനത്തിനെതിരെയും വ്യാപക വിമര്‍ശനമാണ് ഉയര്‍ന്നത്.
രണ്ടാം ടെസ്റ്റില്‍ കെഎല്‍ രാഹുലിന്‍റെ പൊസിഷനിലാണ് ഇന്ത്യന്‍ ടീമില്‍ ഒഴിവുള്ളത്. ഈ സ്ഥാനത്തേക്ക് എത്താന്‍ സര്‍ഫറാസ് ഖാനും രജത് പടിദാറും തമ്മിലായിരിക്കും മത്സരം. നിലവിലെ സാഹചര്യത്തില്‍ വിശാഖപട്ടണത്ത് ഇംഗ്ലണ്ടിനെതിരെ രണ്ടാം മത്സരത്തിന് ഇറങ്ങുമ്പോള്‍ മധ്യപ്രദേശ് താരം രജത് പടിദാര്‍ ഇന്ത്യയ്‌ക്കായി അരങ്ങേറാനാണ് കൂടുതല്‍ സാധ്യത.
ഇംഗ്ലണ്ട് ലയണ്‍സിനെതിരെ ഇന്ത്യ എ ടീമിനെതിരെ നടത്തിയ മിന്നും പ്രകടനങ്ങളാണ് താരത്തിന് അനുകൂല ഘടകം. കൂടാതെ, പന്തെറിയാനുള്ള കഴിവും താരത്തിന് മുതല്‍ക്കൂട്ടാണ്. ഫസ്റ്റ് ക്ലാസ് ക്രിക്കറ്റിലെ 55 മത്സരങ്ങളില്‍ നിന്നും 4000 റണ്‍സാണ് പടിദാറിന്‍റെ അക്കൗണ്ടിലുള്ളത്.
12 സെഞ്ച്വറികളും 22 ഫിഫ്‌റ്റിയും താരം അടിച്ചെടുത്തിട്ടുണ്ട്. 196 ആണ് ഏറ്റവും ഉയര്‍ന്ന വ്യക്തിഗത സ്കോര്‍. രാഹുലിന് പകരം പടിദാര്‍ ടീമിലേക്ക് എത്തിയാല്‍ അരങ്ങേറ്റത്തിനായി സര്‍ഫറാസ് ഖാന് ഇനിയും കാത്തിരിക്കേണ്ടി വരും.
സര്‍ഫറാസ് ഖാന്‍റെ സാധ്യതകള്‍ ഇങ്ങനെ : രാഹുലിന് പകരം രജത് പടിദാര്‍ വിശാഖപട്ടണത്ത് ഇറങ്ങിയാല്‍ സൈഡ് ബെഞ്ചിലായിരിക്കും സര്‍ഫറാസ് ഖാന് സ്ഥാനം. ഇങ്ങനെ വന്നാല്‍ ശുഭ്‌മാന്‍ ഗില്ലിന്‍റെ സ്ഥാനത്തെ ആശ്രയിച്ചിരിക്കും ടീമിലേക്കുള്ള സര്‍ഫറാസ് ഖാന്‍റെ വരവ്. ടെസ്റ്റ് ക്രിക്കറ്റില്‍ സമീപ കാലത്തായി മോശം ഫോമിലാണ് ഗില്‍.
Also Read : ജഡേജ മാത്രമല്ല, രാഹുലും പുറത്ത്...സർഫറാസിന് ടെസ്റ്റ് ടീമിലേക്ക് വിളി...
കഴിഞ്ഞ 10 ഇന്നിങ്‌സുകളില്‍ നിന്നും ഒരു അര്‍ധസെഞ്ച്വറി പോലും നേടാന്‍ ഗില്ലിന് സാധിച്ചിട്ടില്ല. ഗില്ലിനെ ഒഴിവാക്കിയാല്‍ സര്‍ഫറാസ് ഖാന് ഉറപ്പായും പ്ലെയിങ് ഇലവനില്‍ ഇടം പിടിച്ചേക്കും. എന്നാല്‍, ഗില്ലിന് കൂടുതല്‍ അവസരം നല്‍കാനാണ് ടീം മാനേജ്‌മെന്‍റിന്‍റെ പദ്ധതിയെങ്കില്‍ സര്‍ഫറാസ് ഖാന് സൈഡ് ബെഞ്ചില്‍ തന്നെ ഇരിക്കേണ്ടി വരും.
