വാഷിങ്ടൺ: ഡ്രോണ്‍ ആക്രമണത്തില്‍ തങ്ങളുടെ മൂന്ന് സൈനീകര്‍ കൊല്ലപ്പെട്ടതിന് പിന്നാലെ തിരിച്ചടിയാരംഭിച്ച് അമേരിക്ക. ഇറാഖിലും സിറിയയിലും ഇറാനുമായി ബന്ധപ്പെട്ട 85 കേന്ദ്രങ്ങളിൽ യുഎസ് സൈന്യം കനത്ത വ്യോമാക്രമണം നടത്തി. ഇസ്ലാമിക് റെവല്യൂഷണറി ഗാർഡ് കേന്ദ്രങ്ങളെ ലക്ഷ്യമിട്ടായിരുന്നു അമേരിക്കയുടെ ആക്രമണം. തിരിച്ചടി 30 മിനിറ്റോളം നീണ്ടുനിന്നു (US Launches Retaliatory Strikes on Iran linked Militia).
അക്രമണത്തിനുപിന്നാലെ പശ്ചിമേഷ്യയിൽ യുഎസ് സംഘർഷം ആഗ്രഹിക്കുന്നില്ലെന്നും ഏതെങ്കിലും അമേരിക്കക്കാരനെ അപായപ്പെടുത്തിയാൽ രാജ്യം അത് നേരിടുമെന്നും പ്രസിഡൻ്റ് ജോ ബൈഡൻ തുറന്നടിച്ചു. "യുണൈറ്റഡ് സ്‌റ്റേറ്റ്സ് മിഡിൽ ഈസ്‌റ്റിലോ ലോകത്തെ മറ്റെവിടെയെങ്കിലുമോ സംഘർഷം ആഗ്രഹിക്കുന്നില്ല. എന്നാൽ ഞങ്ങളെ ഉപദ്രവിക്കാൻ ശ്രമിക്കുന്ന എല്ലാവരും ഇത് അറിയണം, നിങ്ങൾ ഒരു അമേരിക്കക്കാരനെ ഉപദ്രവിച്ചാൽ ഞങ്ങൾ പ്രതികരിക്കും." ബൈഡൻ വ്യക്തമാക്കി.
അതേസമയം ഞായറാഴ്‌ച തങ്ങളുടെ സൈനികർ കൊല്ലപ്പെട്ട ആക്രമണത്തിനുള്ള ആദ്യ മറുപടി മാത്രമാണിതെന്നും ഇത് ലക്ഷ്യം കാണുന്നതുവരെ തുടരുമെന്നും വൈറ്റ് ഹൗസ് പുറത്തിറക്കിയ വാർത്താ കുറിപ്പിൽ വ്യക്തമാക്കി. ഞായറാഴ്‌ച ജോർദാനിലെ യുഎസ് സൈനിക ഔട്ട്‌പോസ്‌റ്റിൽ ഇറാൻ പിന്തുണയുള്ള തീവ്രവാദികൾ നടത്തിയ ഡ്രോൺ ആക്രമണത്തില്‍ മൂന്ന് യുഎസ് സൈനികര്‍ കൊല്ലപ്പെട്ടിരുന്നു. 40-ലധികം പേർക്ക് പരിക്കേൽക്കുകയും ചെയ്‌തു. കൊല്ലപ്പെട്ട സൈനികരെ ആദരിക്കുന്ന ചടങ്ങിൽ പ്രസിഡൻ്റ് ജോ ബൈഡൻ പങ്കെടുക്കുകയും, അവരുടെ കുടുംബാംഗങ്ങളെ കാണുകയും ചെയ്‌തതിന് തൊട്ടുപിന്നാലെയാണ് സൈന്യം തിരിച്ചടിയാരംഭിച്ചത്.
തങ്ങൾ ഇറാനുമായി യുദ്ധത്തിന് ശ്രമിക്കുന്നില്ലെന്നും അങ്ങനെ പശ്ചിമേഷ്യയിൽ സംഘർഷാവസ്ഥ സൃഷ്‌ടിക്കാൻ ആഗ്രഹിക്കുന്നില്ലെന്നും യുഎസ് നാഷണൽ സെക്യൂരിറ്റി കൗൺസിലിൻ്റെ സ്ട്രാറ്റജിക് കമ്മ്യൂണിക്കേഷൻസ് കോർഡിനേറ്റർ ജോൺ കിർബി പറഞ്ഞു. ജോർദാനിലെ ഡ്രോൺ ആക്രമണത്തിന് പിന്നില്‍ ഇറാഖിലെ ഇസ്ലാമിക് റെസിസ്‌റ്റൻസ് എന്ന സംഘമാണ്. ആക്രമണം 'കതാഇബ് ഹിസ്ബുള്ള' ഉൾപ്പെടെയുള്ള ഒന്നിലധികം സംഘങ്ങൾ കൃത്യമായി ആസൂത്രണം ചെയ്‌ത്‌ നടപ്പാക്കിയതാണെന്നാണ് വൈറ്റ് ഹൗസ് വിശ്വസിക്കുന്നതെന്നും അദ്ദേഹം കൂട്ടിച്ചേര്‍ത്തു.
അതേസമയം തങ്ങൾ സംഘർഷം ആഗ്രഹിക്കുന്നില്ലെന്ന് വ്യക്‌തമാക്കിയ ഇറാൻ, ആക്രമണത്തോട് ശക്തമായി പ്രതികരിക്കാനുള്ള സന്നദ്ധത അറിയിച്ചു. ഇറാൻ യുദ്ധം തുടങ്ങിവയ്‌ക്കില്ലെന്നും എന്നാൽ ഭീഷണിപ്പെടുത്തൽ തന്ത്രങ്ങളോട് ശക്തമായി പ്രതികരിക്കുമെന്നും ഇറാൻ പ്രസിഡൻ്റ് ഇബ്രാഹിം റെയ്‌സി പറഞ്ഞതായാണ് അന്താരാഷ്‌ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നത്.
അതിനിടെ അമേരിക്കൻ ഔട്ട്‌പോസ്‌റ്റ് ആക്രമിച്ചതിന് ഉത്തരവാദികളെന്ന് കരുതപ്പെടുന്ന കതാഇബ് ഹിസ്ബുള്ള, അമേരിക്കയ്‌ക്കെതിരായ തങ്ങളുടെ നീക്കങ്ങള്‍ താൽകാലികമായി നിർത്തിവയ്‌ച്ചതായി പ്രഖ്യാപിച്ചു. ഇറാഖ് സർക്കാരിന് നാണക്കേട് ഉണ്ടാകാതിരിക്കാൻ യുഎസ് സേനയ്‌ക്കെതിരായ സൈനിക പ്രവർത്തനങ്ങൾ താൽക്കാലികമായി നിർത്തിവയ്‌ച്ചതായാണ് കതാഇബ് ഹിസ്ബുള്ള നടത്തിയ പ്രഖ്യാപനം.
