വാഷിങ്‌ടണ്‍ : അമേരിക്കയിലേക്കുള്ള ടിക് ടോക്കിൻ്റെ തിരിച്ച് വരവിൽ നിയുക്ത പ്രസിഡൻ്റ് ഡൊണാൾഡ് ട്രംപിന് നന്ദി അറിയിച്ച് കമ്പനി. അധികാരത്തിൽ തിരിച്ചെത്തിയാൽ ടിക് ടോക് പുനസ്ഥാപിക്കുമെന്ന് ട്രംപ് നേരത്തെ തന്നെ വ്യക്തമാക്കിയിരുന്നു. ടിക് ടോക്കിൻ്റെ 50 ശതമാനം നിയന്ത്രണം അമേരിക്കയ്‌ക്ക് നൽകണമെന്ന വ്യവസ്ഥയിലാണ് ആപ്പിൻ്റെ പുനരുജ്ജീവനം. ഡൊണൾഡ് ട്രംപിൻ്റെ പിന്തുണ ഉറപ്പായതിന് പിന്നാലെ ടിക് ടോക് യുഎസില്‍ പ്രവര്‍ത്തനം ആരംഭിച്ച് തുടങ്ങി. എക്‌സിലൂടെയാണ് അമേരിക്കയിലെ സേവനങ്ങൾ പുനസ്ഥാപിച്ചതായി ടിക് ടോക് അറിയിച്ചത്.
നിരോധനത്തിന് തൊട്ടുമുന്‍പ് ആപ്പിളിൻ്റെയും (ഐഒഎസ്) ഗൂഗിളിൻ്റെയും ആപ്പ് സ്റ്റോറുകളില്‍ നിന്ന് ടിക് ടോക് നീക്കിയിരുന്നു. നേരത്തെ നിരോധനം തടയാന്‍ ചൈനീസ് കമ്പനിയായ ടിക് ടോക് സുപ്രീം കോടതിയെ സമീപിച്ചിരുന്നുവെങ്കിലും അനുകൂല വിധി വന്നില്ല. കമ്പനിയുടെ നിയന്ത്രണം അമേരിക്കന്‍ കമ്പനികളുടെ ഉടമസ്ഥതയിലേക്ക് മാറ്റണം എന്ന യുഎസ് സുപ്രീം കോടതി ഉത്തരവ് ടിക് ടോക് പാലിച്ചിരുന്നില്ല. ഇതിനെ തുടര്‍ന്നാണ് നിരോധനത്തിനുള്ള അരങ്ങൊരുങ്ങിയത്.
വര്‍ഷങ്ങള്‍ നീണ്ട നിയമനടപടികള്‍ക്കൊടുവിലാണ് ടിക് ടോക്കിന് യുഎസില്‍ നിരോധനത്തിന് വിധേയരാകേണ്ടി വന്നത്. ജനുവരി 18 ശനിയാഴ്‌ച തന്നെ ടിക് ടോക ഔദ്യോഗികമായി സേവനം അവസാനിപ്പിച്ചിരുന്നു. ആപ്പ് തുറക്കുന്നവര്‍ക്ക് സേവനം ലഭ്യമല്ല എന്ന സന്ദേശമാണ് സ്‌ക്രീനില്‍ കാണിച്ചിരുന്നത്. എന്നാൽ തിരിച്ച് വരവിന് മുന്നോടിയായുള്ള താത്‌കാലിക പിന്മാറ്റം മാത്രമായിരുന്നു അത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
യുഎസിലെ ഇൻ്റര്‍നെറ്റ് വിപണിയില്‍ ഒരു ചൈനീസ് കമ്പനി ആധിപത്യം സ്ഥാപിക്കുന്നതിലെ എതിർപ്പാണ് യുഎസിലെ ആപ്പ് നിരോധനം. എന്നാൽ ആശങ്കകള്‍ക്ക് വിരാമമിട്ടാണ് ട്രംപിൻ്റെ നിർണായക നീക്കം. സ്വകാര്യത, രാജ്യ സുരക്ഷ എന്നിവയുമായി ബന്ധപ്പെട്ട ആരോപണങ്ങള്‍ക്കാണ് ഇതോടെ വിരമമാകുന്നത്.
2019 മുതലാണ് ആപ്പിൻ്റെ സേവനം യുഎസിൽ ലഭ്യമല്ലാതെയാകുന്നത്. 17 കോടി അമേരിക്കന്‍ യൂസർ ഉണ്ടായിരുന്ന ടിക് ടോക്കിനെതിരെ 2020ല്‍ ആദ്യ ട്രംപ് ഭരണകൂടത്തിൻ്റെ കാലത്താണ് നിയമനടപടികള്‍ നടപടികള്‍ ആരംഭിച്ചത്. തുടർന്ന് ഔദ്യോഗികമായി നിയമം പ്രാബല്യത്തിൽ വരികയും ചെയ്‌തു.
ഉപഭോക്താക്കളുടെ ഡാറ്റയുടെയും സ്വകാര്യതയുടേയും കാര്യത്തില്‍ മാതൃ സ്ഥാപനമായ ബൈറ്റ്ഡാന്‍സും ടിക് ടോക്കും യുഎസിന് പലവിധ ഉറപ്പുകള്‍ നല്‍കിയിട്ടും വിലപോയില്ല. തുടർന്ന് ഏറെ നാളത്തെ നിയമ പോരാട്ടങ്ങള്‍ക്കൊടുവിൽ എന്നന്നേക്കുമായി ടിക് ടോക്കിന് തിരശീല വീഴുകയായിരുന്നു.
