വാഷിങ്ടൺ: പെൻസിൽവാനിയയിലെ റാലിയ്ക്ക് ഇടയിലുണ്ടായ വധശ്രമത്തിൽ നിന്ന് രക്ഷപ്പെട്ട ട്രംപ് മിൽവാക്കിയിൽ നടന്ന റിപ്പബ്ലിക്കന് നാഷണല് കൺവെൻഷനില് വെച്ച് തന്റെ വൈസ് പ്രസിഡന്റിനെ പ്രഖ്യാപിച്ചു. ഒഹായോയില് നിന്നുളള യുഎസ് സെനറ്റർ ജെ ഡി വാൻസിനെയാണ് ട്രംപ് തന്റെ വിപിയായി തെരഞ്ഞെടുത്തത്. എട്ട് വര്ഷം മുന്പ് ട്രംപിന്റെ കടുത്ത വിമര്ശകനായിരുന്നെങ്കില്പ്പോലും അദ്ദേഹത്തിന്റെ ജനകീയ പദ്ധതികളുമായി സഹകരിച്ചിരുന്ന വ്യക്തികൂടിയാണ് ജെ ഡി വാൻസ്.
തന്റെ വൈസ് പ്രസിഡന്റാകാൻ ഏറ്റവും അനുയോജ്യൻ വാൻസ് ആണെന്നാണ് ട്രംപിന്റെ അഭിപ്രായം. 'വൈസ് പ്രസിഡൻ്റ് എന്ന നിലയിൽ ജെഡി നമ്മുടെ ഭരണഘടനയ്ക്കുവേണ്ടി പോരാടുന്നത് തുടരും. നമ്മുടെ സൈനികർക്കൊപ്പം നിൽക്കും. അമേരിക്കയെ വീണ്ടും മഹത്തരമാക്കാൻ എന്നെ സഹായിക്കും'- എന്ന് മുൻ യുഎസ് പ്രസിഡൻ്റ് കുറിച്ചു. വാൻസിനെ തെരഞ്ഞെടുത്തതിലൂടെ ഈ തെരഞ്ഞെടുപ്പില് ഡൊണാൾഡ് ട്രംപ് പ്രാധാന്യം നല്കുന്നത് മിഡ്വെസ്റ്റിലെ പ്രധാന സംസ്ഥാനങ്ങളായ പെൻസിൽവാനിയ, മിഷിഗൺ, വിസ്കോൺസിൻ എന്നിവയിലാണെന്ന് കണകാക്കാം.
ഒഹായോയിലെ ഒരു ദരിദ്രകുടുംബത്തിലായിരുന്നു വാൻസിന്റെ ജനനം. ഒഹായോ സ്റ്റേറ്റ് യൂണിവേഴ്സിറ്റി, യേൽ ലോ സ്കൂൾ എന്നിവിടങ്ങളിലായി വിദ്യാഭ്യാസം പൂര്ത്തിയാക്കി. പിന്നീട് യുഎസ് സൈനികനായി പ്രവർത്തിച്ച വാൻസ് ഒഹായോയിലെ കുട്ടിക്കാലത്തെയും കുടുംബത്തെയും കുറിച്ച് എഴുതിയ ഓര്മക്കുറിപ്പ് 'ഹിൽബിലി എലജി' വലിയ ജനശ്രദ്ധ നേടി. ഒഹായോയില് ട്രംപിന് വോട്ട് കൂട്ടുന്നതില് വാൻസിന് വലിയ പങ്ക് വഹിക്കാന് കഴിയുമെന്നാണ് വിലയിരുത്തല്.
2021ലാണ് വാന്സ് രാഷ്ട്രീയ പ്രവര്ത്തനത്തിലേക്കിറങ്ങുന്നത്. കുറഞ്ഞ സമയം കൊണ്ട് തന്നെ കര്ഷകരുടെയും സാധാരണ മനുഷ്യരുടെയും നേതാവാകാന് വാന്സിന് കഴിഞ്ഞു. ഡെമോക്രാറ്റിക് സ്ഥാനാർഥി ടിം റയാനെയെ പരാജയപ്പെടുത്തിയാണ് വാന്സ് സെനറ്ററായി തെരഞ്ഞെടുക്കപ്പെടുന്നത്. ഇന്ത്യന് വംശജയായ ഉഷ ചിലുകുരിയാണ് ജെഡിയുടെ ഭാര്യ.