ബോളിവുഡിൽ അടുത്തിടെ ഇറങ്ങിയ സിനിമകളിൽ വിജയംകൊയ്‌ത അപൂർവം ചിത്രങ്ങളിൽ ഒന്നാണ് 'ശൈത്താൻ'. അജയ് ദേവ്‍ഗണ്‍ നായകനായി എത്തിയ ഈ ചിത്രം മികച്ച കലക്ഷൻ സ്വന്തമാക്കിയതായാണ് റിപ്പോർട്ടുകൾ. ഇപ്പോഴിതാ ഈ സിനിമയുടെ ഒടിടി റിലീസ് സംബന്ധിച്ച വിവരങ്ങളാണ് പുറത്തുവരുന്നത്.
മെയ് മൂന്നിനാകും 'ശൈത്താൻ' ഒടിടിയില്‍ എത്തുക എന്നാണ് പുറത്തുവരുന്ന റിപ്പോർട്ടുകൾ. പ്രമുഖ ഒടിടി പ്ലാറ്റ്‌ഫോമായ നെറ്റ്ഫ്ലിക്‌സിലൂടെയാകും ഈ ചിത്രം പ്രദർശനത്തിനെത്തുക. അജയ് ദേവ്‍ഗണിനൊപ്പം ജ്യോതികയും മാധവനുമാണ് ഈ ഹൊറര്‍ ചിത്രത്തിൽ പ്രധാന വേഷത്തിലെത്തിയത്.
വികാസ് ബഹ്‍ലാണ് 'ശൈത്താൻ' സിനിമയുടെ സംവിധായകൻ. നായകനായ അജയ് ദേവ്‍ഗണ്‍ ഈ ചിത്രത്തിന്‍റെ നിര്‍മാണ പങ്കാളിയുമാണ്. മാർച്ച് എട്ടിനാണ് 'ശൈത്താൻ' തിയേറ്ററുകളിലൂടെ പ്രേക്ഷകരിലേക്ക് എത്തിയത്. തിയേറ്ററുകളിൽ തിളങ്ങിയ ശൈത്താൻ ഒടിടിയിൽ എത്തുന്നതിന്‍റെ സന്തോഷത്തിലാണ് ആരാധകർ.
ആഗോള ബോക്‌സ് ഓഫിസില്‍ ആകെ 197.50 കോടി രൂപയില്‍ അധികം 'ശൈത്താൻ' കളക്ഷൻ നേടി എന്നാണ് റിപ്പോർട്ടുകൾ പറയുന്നത്. അജയ് ദേവ്ഗൺ ഫിലിംസ്, പനോരമ സ്റ്റുഡിയോസ് ഇന്‍റർനാഷണൽ, ജിയോ സ്റ്റുഡിയോ എന്നിവയുടെ ബാനറിൽ അജയ് ദേവ്ഗൺ, ജ്യോതി ദേശ്‌പാണ്ഡെ, കുമാർ മങ്ങാട് പഥക്, അഭിഷേക് പഥക് എന്നിവർ ചേർന്നാണ് ഈ ചിത്രത്തിന്‍റെ നിർമാണം. സഹനിർമാതാക്കളായി സഞ്ജീവ് ജോഷി, ആദിത്യ ചൗക്‌സി, അമിത് ഡാൽമിയ എന്നിവരുമുണ്ട്.
മാധവനാണ് ചിത്രത്തിൽ ഭയപ്പെടുത്തുന്ന, ശൈത്താനായി വേഷമിട്ടത്. ജാങ്കി ബോഡിവാല, ആങ്കത് മഹോലേ എന്നിവരും ഈ സിനിമയിൽ പ്രധാന വേഷങ്ങളിലുണ്ട്. സുധാകര്‍ റെഡ്ഡി യക്കാന്തിയാണ് ഈ ചിത്രത്തിന്‍റെ ഛായാഗ്രഹണം നിർവഹിച്ചത്. സംഗീത സംവിധാനം അമിത് ത്രിവേദിയും നിർവഹിച്ചിരിക്കുന്നു.
READ ALSO: അതിഥി 'ശൈത്താനാ'യി മാറിയ കഥ; ട്രെയിലറിൽ ഞെട്ടിച്ച് മാധവൻ, ഒപ്പം ജ്യോതികയും അജയ് ദേവ്‌ഗണും
