എറണാകുളം: പുള്ളവൻ പാട്ടിന്‍റെയും വടക്കൻ മലബാറിന്‍റെയും പശ്ചാത്തലത്തിൽ കഥ പറയുന്ന 'മായമ്മ' എന്ന ചിത്രത്തിന്‍റെ വിശേഷങ്ങള്‍ പങ്കുവച്ച് ഇടിവി ഭാരതിനൊപ്പം ചേർന്ന് അണിയറ പ്രവർത്തകർ. തിരക്കഥാകൃത്തും സംവിധായകനുമായ രമേശ് കുമാർ കോറമംഗലം, ക്യാമറ ചലിപ്പിച്ച നവീൻ കെ സാജ്, എക്‌സിക്യൂട്ടീവ് പ്രൊഡ്യൂസർ രാജശേഖരൻ നായർ, അഭിനേതാക്കളിൽ ഒരാളായ ബിജു കലാവേദി എന്നിവര്‍ സിനിമയെക്കുറിച്ച് വാചാലരായി. പുള്ളുവത്തി പെൺകുട്ടിയുടെയും ഉന്നത കുലജാതനായ യുവാവിന്‍റെയും പ്രണയ കഥ പറയുന്ന ചിത്രം കേരളത്തിലെ സാമൂഹിക രാഷ്ട്രീയ അനാചാരങ്ങൾക്കെതിരെ ചൂണ്ടുന്ന വിരൽ കൂടിയാകും.
വടക്കൻ മലബാറിന്‍റെ പശ്ചാത്തലത്തിൽ കഥ പറയുന്നുണ്ടെങ്കിലും തിരുവനന്തപുരം ജില്ലയിലെ വർക്കല, കാപ്പിൽ തുടങ്ങിയ സ്ഥലങ്ങളിൽ ആണ് സിനിമയുടെ ചിത്രീകരണം. വടക്കൻ മലബാറിനെ തെക്കൻ കേരളത്തിലേക്ക് പറിച്ചുനട്ടതായി തോന്നാതിരിക്കാൻ ഉള്ള ശ്രമങ്ങൾ ആയിരുന്നു ഛായാഗ്രഹണം ഒരുക്കുമ്പോൾ പ്രധാന ചലഞ്ച് ആയി മുന്നിലെത്തിയതെന്ന് ഡിഒപി നവീൻ പ്രതികരിച്ചു.
മികച്ച ആശയങ്ങൾ മലയാള സിനിമയ്ക്ക് സമ്മാനിക്കുന്നതിനും സംവിധായകൻ രമേഷ് കുമാറുമായുള്ള സൗഹൃദവും ആണ് ചിത്രം നിർമ്മിക്കാനുള്ള പ്രചോദനം എന്നാണ് എക്‌സിക്യൂട്ടീവ് പ്രൊഡ്യൂസർ രാജശേഖരൻ നായര്‍ പറഞ്ഞത്. ജയ ജയ ജയഹേ എന്ന ചിത്രത്തിൽ ജയയുടെ അച്ഛനായി അഭിനയിച്ച്‌ പ്രശസ്‌തിയാർജിച്ച ബിജു കലാവേദി വീണ്ടും വേഷമിടുന്ന ചിത്രം കൂടിയാണിത്.
നിരവധി ചിത്രങ്ങളിൽ സഹ സംവിധായകനായും ചെറിയ വേഷങ്ങളും കൈകാര്യം ചെയ്‌തിട്ടുള്ള തനിക്ക് കഴിഞ്ഞ ചിത്രത്തിൽ നിന്ന് കിട്ടിയ മൈലേജ് കൃത്യമായി പ്രയോജനം ചെയ്‌ത ചിത്രം കൂടിയാണ് 'മായമ്മ' എന്ന് ബിജു കലാവേദി പ്രതികരിച്ചു. വിജിതമ്പി ജയൻ ചേർത്തല തുടങ്ങിയ സീനിയർ താരങ്ങൾ ചിത്രത്തിൽ വേഷമിടുന്നുണ്ട്.
വിജിതമ്പി മലയാളത്തിലെ പ്രശസ്‌തനായ സംവിധായകൻ ആണെങ്കിലും ഒരിക്കലും തന്‍റെ ജോലികളിൽ കയറി ഇടപെട്ടിട്ടില്ലെന്ന് സംവിധായകൻ തുറന്നു പറഞ്ഞു. എങ്കിലും തിരക്കഥയിലെ ചില പോരായ്‌മകൾ ചൂണ്ടിക്കാട്ടി അത് പരിഹരിക്കാനുള്ള നിർദേശങ്ങൾ എല്ലാം വിജിതമ്പി നൽകിയിട്ടുണ്ട്. അത് തിരക്കഥയെ കൂടുതൽ മെച്ചപ്പെടുത്തുന്നതിന് സഹായകമായി.
ALSO READ: ഏലിയന്‍ ചിത്രം 'ഗഗനചാരി' ; റിലീസ് ഡേറ്റ് പുറത്തുവിട്ട് അണിയറപ്രവർത്തകർ
