ഫിലിം ഫെയർ അവാർഡ്‌സ് സൗത്ത് 2023 ൽ മികച്ച നടനായി മലയാളത്തിന്‍റെ ദുൽഖർ സൽമാൻ. സീതാരാമം എന്ന തെലുങ്ക് ചിത്രത്തിലെ അഭിനയ മികവിനാണ് ക്രിട്ടിക്‌സ് അവാർഡ് ദുൽഖർ സൽമാൻ സ്വന്തമാക്കിയത്. ദുൽഖർ സൽമാന്‍റെ നാലാമത്തെ ഫിലിം ഫെയർ അവാർഡാണിത്. തെലുങ്ക് ചിത്രത്തിലെ പ്രകടനത്തിന് അദ്ദേഹം സ്വന്തമാക്കുന്ന രണ്ടാമത്തെ ഫിലിം ഫെയർ അവാർഡും.
2019 ൽ മഹാനടി എന്ന ചിത്രത്തിലെ പ്രകടനത്തിനും മികച്ച നടനുള്ള ഫിലിം ഫെയർ അവാർഡ്‌സ് സൗത്ത് ദുൽഖർ സൽമാൻ തിരഞ്ഞെടുക്കപ്പെട്ടിരുന്നു. മികച്ച ചിത്രത്തിനുള്ള ക്രിട്ടിക്‌സ് അവാർഡ് സീതാരാമം നേടിയെടുത്തു. 2022-ൽ റിലീസ് ചെയ്‌ത സീതാരാമം എന്ന തെലുങ്ക് ചിത്രം മികച്ച പ്രേക്ഷക, നിരൂപക പ്രശംസകള്‍ നേടിയ ചിത്രമായിരുന്നു.
ദുൽഖർ സൽമാന്‍റെ കരിയറിലെ ഏറ്റവും വലിയ ബോക്‌സ് ഓഫിസ് ഹിറ്റ് കൂടിയായ സീതാരാമം എഴുതി സംവിധാനം ചെയ്‌തത് ഹനു രാഘവപുടിയാണ്. മൃണാൾ താക്കൂർ നായികാ വേഷം ചെയ്‌ത ഈ ചിത്രത്തിൽ രശ്‌മിക മന്ദാനയും നിർണ്ണായക വേഷം കൈകാര്യം ചെയ്‌തിരുന്നു.
തെലുങ്ക് കൂടാതെ തമിഴ്, മലയാളം, ഹിന്ദി ഭാഷകളിലും റിലീസ് ചെയ്‌ത ചിത്രം നിർമ്മിച്ചത് വൈജയന്തി മൂവീസ്, സ്വപ്‌ന സിനിമാസ് എന്നിവയുടെ ബാനറിൽ സി അശ്വനി ദത്താണ്‌. സൗത്ത് ഇന്ത്യൻ ഇന്‍റർനാഷണൽ മൂവി അവാർഡ്‌സിൽ മികച്ച തെലുങ്ക് ചിത്രം, മികച്ച നടി എന്നിവക്കുള്ള അവാർഡും ഈ ചിത്രം നേടിയെടുത്തിരുന്നു.
Also Read: വെള്ളിത്തിര കീഴടക്കാനൊരുങ്ങി ദുൽഖർ സൽമാൻ; ലക്കി ഭാസ്‌കർ റിലീസിങ് തീയതി പ്രഖ്യാപിച്ചു
