പ്രേക്ഷകരുടെ വർഷങ്ങൾ നീണ്ട കാത്തിരിപ്പിനൊടുവിൽ പുറത്തുവന്ന സിനിമയാണ് ബ്ലെസിയുടെ സ്വപ്‌നചിത്രമായ ആടുജീവിതം. ഇന്നിതാ 100 കോടിയും കടന്ന്, മലയാളസിനിമയിൽ ചരിത്രനേട്ടവുമായി കുതിക്കുകയാണ് ഈ ചിത്രം. പൃഥ്വിരാജ് കേന്ദ്ര കഥാപാത്രമായി എത്തിയ ആടുജീവിതത്തിലെ പുതിയ ഗാനം പുറത്തിറങ്ങിയിരിക്കുകയാണ്.
അറബിക് ഭാഷയില്‍ രചിക്കപ്പെട്ടിട്ടുള്ള ഗാനം തിയേറ്ററുകളിൽ പ്രേക്ഷകർക്ക് വേറിട്ട അനുഭൂതി സമ്മാനിച്ചിരുന്നു. എആര്‍ റഹ്മാനാണ് വരികള്‍ എഴുതി, ഈ ഗാനം ചിട്ടപ്പെടുത്തിയത്. രാജാ ഹസനും ഫൈസ് മുസ്‌തഫയും ചേര്‍ന്നാണ് ആലാപനം. വിഷ്വൽ റൊമാൻസിന്‍റെ യൂട്യൂബ് ചാനലിലൂടെ പുറത്തുവന്ന ഗാനം ഇതിനോടകം 1.2 ലക്ഷം കാഴ്‌ചക്കാരെ സ്വന്തമാക്കി കഴിഞ്ഞു.
- " class="align-text-top noRightClick twitterSection" data="">
രാജ ഹസനും ഫൈസ് മുസ്‌തഫയും എആര്‍ റഹ്മാനും ചേര്‍ന്ന് ഗാനം ആലപിക്കുന്ന ദൃശ്യങ്ങളും പാട്ടിന്‍റെ വീഡിയോയില്‍ ഉൾപ്പെടുത്തിയിട്ടുണ്ട്. ബെന്യാമിന്‍റെ 'ആടുജീവിതം' എന്ന പേരിൽ തന്നെയുള്ള അവാർഡ്‌ വിന്നിങ്ങ് നോവലിനെ ആസ്‌പദമാക്കി ബ്ലെസി ഒരുക്കിയ ഈ സിനിമ 2024 മാർച്ച് 28-നാണ് തിയേറ്ററുകളിലെത്തിയത്. ഹിന്ദി, തമിഴ്, തെലുഗു, കന്നഡ എന്നീ ഭാഷകളിലായാണ് ഈ അതിജീവന കഥ റിലീസ് ചെയ്‌തത്.
വർഷങ്ങളെടുത്ത് പല പ്രതിസന്ധികളെയും തരണം ചെയ്‌ത് കൂടിയായിരുന്നു ഈ സിനിമയുടെ നിർമാണം പൂർത്തീകരിച്ചത്. ചിത്രത്തിലെ നജീബ് എന്ന കഥാപാത്രത്തിനായി പൃഥ്വിരാജ് കടന്നുപോയ ശാരീരിക മാറ്റങ്ങൾ വലിയ രീതിയിൽ ചർച്ച ചെയ്യപ്പെട്ടിരുന്നു. വിഷ്വൽ റൊമാൻസിന്‍റെ ബാനറിലാണ് ആടുജീവിതം അണിയിച്ചൊരുക്കിയത്.
ഓസ്‌കാർ അവാർഡ്‌ ജേതാക്കളായ എ ആർ റഹ്മാന്‍റെ സംഗീതവും റസൂൽ പൂക്കുട്ടിയുടെ ശബ്‌ദമിശ്രണവും ഈ ചിത്രത്തിന്‍റെ പ്രധാന ആകർഷണങ്ങളായിരുന്നു. കെആർ ഗോകുൽ, ജിമ്മി ജീൻ ലൂയിസ് (ഹോളിവുഡ് നടൻ), പ്രശസ്‌ത അറബ് അഭിനേതാക്കളായ താലിബ് അൽ ബലൂഷി, റിക്കാബി എന്നിവരും പ്രധാന കഥാപാത്രങ്ങളെ അവതരിപ്പിച്ച ഈ സിനിമയിൽ നായികയായി എത്തിയത് അമല പോളാണ്.
ഛായാഗ്രഹണം : സുനിൽ കെ എസ്, ചിത്രസംയോജനം : ശ്രീകർ പ്രസാദ്, പ്രൊഡക്ഷൻ കൺട്രോളർ : പ്രിൻസ് റാഫേൽ, ദീപക് പരമേശ്വരൻ, കോസ്റ്റ്യൂംസ് : സ്റ്റെഫി സേവ്യർ, ചീഫ് അസോസിയേറ്റ് ഡയറക്ർ‌ടർ : റോബിൻ ജോർജ്, ലൈൻ പ്രൊഡ്യൂസർ : സുശീൽ തോമസ്, പ്രൊഡക്ഷൻ ഡിസൈനർ : പ്രശാന്ത് മാധവ്, മേക്കപ്പ് : രഞ്ജിത്ത് അമ്പാടി, വീഡിയോഗ്രാഫി : അശ്വത്, സ്റ്റിൽസ് : അനൂപ് ചാക്കോ, മാർക്കറ്റിംഗ് : ക്യാറ്റലിസ്റ്റ്, ഡിജിറ്റൽ മാർക്കറ്റിംഗ് : ഒബ്‌സ്‌ക്യൂറ എന്‍റർടെയിൻമെൻസ്, പിആർഒ : ആതിര ദിൽജിത്ത്.
