തിരുവനന്തപുരം : കേരള എഞ്ചിനീയറിംഗ്, ആർക്കിടെക്‌ചർ, മെഡിക്കൽ പ്രവേശന പരീക്ഷ (കീം) 2024 ഫലം ഇന്ന് വന്നേക്കും. കേരള പ്രവേശന പരീക്ഷാ കമ്മീഷണറാണ് ഫലപ്രഖ്യാപനം നടത്തുക. കീം 2024-ൻ്റെ അന്തിമ ഉത്തരസൂചിക പ്രവേശന പരീക്ഷാ കമ്മീഷണറുടെ (CEE) ഔദ്യോഗിക വെബ്‌സൈറ്റില്‍ ഇതിനകം പ്രസിദ്ധീകരിച്ചിട്ടുണ്ട്.
ഫലം പ്രഖ്യാപിച്ചാല്‍, ലോഗിൻ ക്രെഡൻഷ്യലുകൾ ഉപയോഗിച്ച് ഓൺലൈനായി cee.kerala.gov.in-ൽ ആപ്ലിക്കേഷൻ നമ്പറും പാസ്‌വേഡും ഉപയോഗിച്ച് ആക്‌സസ് ചെയ്യാവുന്നതാണ്. കീം 2024 ചോദ്യപേപ്പറിന് നാല് മാർക്ക് വീതമുള്ള 120 ചോദ്യങ്ങളാണുണ്ടായിരുന്നത്. ഓരോ തെറ്റുത്തരത്തിനും ഒരു മാർക്ക് കുറയ്ക്കുകയും ചെയ്യും. സംസ്ഥാനത്ത് ഈ വര്‍ഷം മുതല്‍ കീം (KEAM) എഞ്ചിനീയറിങ്, ഫാര്‍മസി പ്രവേശന പരീക്ഷകള്‍ ഓണ്‍ലൈനായാണ് നടത്തുന്നത്.
സംസ്ഥാനത്തെ എല്ലാ ജില്ലകളിലുമായി 130 സര്‍ക്കാര്‍, 198 സ്വാശ്രയ സ്ഥാപനങ്ങള്‍ എന്നിവിടങ്ങളിലെ പരീക്ഷാകേന്ദ്രങ്ങളിലും, ഡല്‍ഹിയിലെ രണ്ട് പരീക്ഷാകേന്ദ്രങ്ങളിലും, മുംബൈ, ദുബായ് എന്നിവിടങ്ങളിലെ ഓരോ ഇടങ്ങളിലുമായാണ് പരീക്ഷ നടന്നത്. ഈ വർഷത്തെ KEAM പരീക്ഷയിൽ ഒരു ലക്ഷത്തിലധികം വിദ്യാർഥികൾ പങ്കെടുത്തു. കേരളത്തിലെ പ്രവേശന പരീക്ഷാ കമ്മീഷണറുടെ കണക്കനുസരിച്ച്, KEAM 2024 ന് 1,13,447 വിദ്യാര്‍ഥികൾ രജിസ്റ്റർ ചെയ്‌തിട്ടുണ്ട്.
പരീക്ഷകൾക്ക് ശേഷം, പ്രവേശന പരീക്ഷാ കമ്മീഷണർ ജൂൺ 10 ന് ഒരു താത്‌കാലിക ഉത്തരസൂചിക പ്രസിദ്ധീകരിച്ചു. വിദ്യാര്‍ഥികൾക്ക് തങ്ങളുടെ എതിർപ്പുകളും തിരുത്തലുകളും ജൂൺ 13 വരെ അയയ്ക്കാൻ അനുവദിച്ചു. വിദ്യാര്‍ഥികളിൽ നിന്ന് ലഭിച്ച പരാതികൾ ഒരു വിദഗ്‌ധ സമിതി അവലോകനം ചെയ്യുകയും അവരുടെ നിരീക്ഷണങ്ങളുടെ അടിസ്ഥാനത്തിൽ പുതുക്കിയ അന്തിമ ഉത്തരസൂചിക ജൂൺ 19-ന് പ്രസിദ്ധീകരിക്കുകയും ചെയ്‌തു.
താത്‌കാലിക ഉത്തരസൂചികയിൽ നിരവധി തിരുത്തലുകൾ വരുത്തിയിട്ടുണ്ട്. ചില ചോദ്യങ്ങൾ ഇല്ലാതാക്കുകയും ചില ചോദ്യങ്ങൾക്കുള്ള ഉത്തരങ്ങൾ പരിഷ്‌കരിക്കുകയും ചെയ്‌തിരുന്നു. ലഭിച്ച ശതമാനവും മാർക്കും CEE Kerala- cee.kerala.gov.in എന്ന ഔദ്യോഗിക വെബ്‌സൈറ്റിൽ നിന്ന് പരിശോധിക്കാവുന്നതാണ്. യോഗ്യതയുള്ള വിദ്യാര്‍ഥികൾക്ക് KEAM കൗൺസിലിംഗിൽ പങ്കെടുക്കാം.
ALSO READ: ക്രമക്കേട് കണ്ടെത്തി, 9 ലക്ഷം പേരെഴുതിയ യുജിസി നെറ്റ് പരീക്ഷ റദ്ദാക്കി; സിബിഐ അന്വേഷണത്തിന് ഉത്തരവ്
