ന്യൂഡല്‍ഹി: ബിജെപി അധ്യക്ഷന്‍ ജെ പി നദ്ദയുടെ ഭാര്യയുടെ മോഷണം പോയ എസ്‌യുവി ഉത്തര്‍പ്രദേശിലെ വാരണസിയില്‍ നിന്ന് കണ്ടെത്തി. ഡല്‍ഹിയിലെ ഗോവിന്ദ്പുരിയിലെ സര്‍വീസ് സ്‌റ്റേഷനില്‍ നിന്ന് രണ്ടാഴ്‌ച മുമ്പാണ് വാഹനം മോഷണം പോയത്. കേസുമായി ബന്ധപ്പെട്ട് മൂന്ന് പേരെ അറസ്‌റ്റ് ചെയ്‌തു. ഉത്തര്‍പ്രദേശ് സ്വദേശികളായ ശിവാന്‍ഷ് ത്രിപാഠി (23), സലീം (34), മുഹമ്മദ് റയീസ് (33) എന്നിവരാണ് പിടിയിലായത്.
വെള്ളനിറത്തിലുള്ള ടൊയോട്ട ഫോര്‍ച്യൂണറാണ് ഡല്‍ഹിയിലെ ഗോവിന്ദ് പുരിയില്‍ നിന്ന് മാര്‍ച്ച് 19ന് മോഷ്‌ടിക്കപ്പെട്ടത്. ഡ്രൈവര്‍ ജോഗീന്ദര്‍ വാഹനം സര്‍വീസ് സ്‌റ്റേഷനിലെത്തിച്ച ശേഷം വീട്ടിലേക്ക് പോയി മടങ്ങി വന്നപ്പോഴേക്കും ഇത് മോഷ്‌ടിക്കപ്പെടുകയായിരുന്നു. ജെ പി നദ്ദയുടെ സ്വന്തം നാടായ ഹിമാചല്‍ പ്രദേശില്‍ ഭാര്യയുടെ പേരില്‍ രജിസ്‌റ്റര്‍ ചെയ്‌തിട്ടുള്ള വാഹനം ആണിത്.
