ഹൈദരാബാദ് : ഹൈദരാബാദ് പൊലീസിന്‍റെ ഒരു വിഭാഗമായ കമ്മിഷണേഴ്‌സ് ടാസ്‌ക് ഫോഴ്‌സിന്‍റെ മുൻ ഡിസിപി രാധാകിഷൻ റാവു അറസ്‌റ്റിൽ. കോൾ ഹാക്ക് ചെയ്യുകയും ചില കമ്പ്യൂട്ടർ സംവിധാനങ്ങളും ഔദ്യോഗിക വിവരങ്ങളും നശിപ്പിക്കുകയും ചെയ്‌ത കേസിൽ വെള്ളിയാഴ്‌ചയാണ് (മാർച്ച് 29) അദ്ദേഹത്തെ സിറ്റി പൊലീസ് അറസ്‌റ്റ് ചെയ്‌തത്. രാധാകിഷൻ റാവുവിനെ പ്രാദേശിക ജയിലിൽ റിമാൻഡ് ചെയ്‌തതായി അധികൃതർ അറിയിച്ചു.
അന്വേഷണത്തിന്‍റെ ഭാഗമായി, ഇന്നലെ ബഞ്ചാര ഹിൽസ് പൊലീസ് സ്‌റ്റേഷനിലേക്ക് ചോദ്യം ചെയ്യലിനായി രാധാകിഷൻ റാവവിനെ വിളിച്ചുവരുത്തിയിരുന്നു. ചോദ്യം ചെയ്യലിൽ, സ്വകാര്യ വ്യക്തികളുടെ പ്രൊഫൈലുകൾ വികസിപ്പിക്കുന്നതിനുള്ള ഗൂഢാലോചന, നിയമാനുസൃതമായ ചുമതലകൾക്കായി ഉദ്ദേശിച്ചിട്ടുള്ള ഔദ്യോഗിക കാര്യങ്ങൾ ചൂഷണം ചെയ്യാനുള്ള ഗൂഢാലോചന തുടങ്ങിയ കുറ്റകൃത്യങ്ങളിൽ തനിക്കുള്ള പങ്കാളിത്തത്തെക്കുറിച്ച് അദ്ദേഹം വെളിപ്പെടുത്തിയെന്ന് വെള്ളിയാഴ്‌ച രാത്രി ഒരു പൊലീസ് പ്രസ്‌താവനയിൽ പറഞ്ഞു.
രാഷ്ട്രീയ പക്ഷപാതപരമായി ചില പ്രവർത്തനങ്ങൾ നടത്തുക, തെരഞ്ഞെടുപ്പ് മാതൃക പെരുമാറ്റച്ചട്ടം നിലവിൽ വരുമ്പോൾ അനധികൃതമായി പണം കടത്താൻ ഔദ്യോഗിക വിവരങ്ങൾ ചോർത്തി നല്‍കുക, പൊതുമുതൽ നശിപ്പിക്കുക, മറ്റുള്ളവരുമായി ഒത്തുചേർന്ന് അവരുടെ നിയമവിരുദ്ധ പ്രവർത്തനങ്ങളുടെ തെളിവ് നശിപ്പിക്കുക തുടങ്ങിയ കാര്യങ്ങളിലുള്ള അദ്ദേഹത്തിന്‍റെ പങ്കിനെ കുറിച്ച് പറഞ്ഞുവെന്നും അധികൃതർ അറിയിച്ചു.
രാധാകിഷൻ റാവുവിന്‍റെ കുറ്റസമ്മത പ്രകാരം ഇന്ന് (മാർച്ച് 30) രാവിലെ എട്ട് മണിയോടെ അന്വേഷണ ഉദ്യോഗസ്ഥൻ അദ്ദേഹത്തെ അറസ്‌റ്റ് ചെയ്യുകയും പ്രാദേശിക കോടതിയിൽ ഹാജരാക്കുകയും ചെയ്‌തു. പൊലീസ് ജുഡീഷ്യൽ കസ്‌റ്റഡി ആവശ്യപ്പെട്ടിരുന്നുവെന്നും കോടതി അത് അംഗീകരിച്ചതായും പ്രസ്‌താവനയിൽ പറഞ്ഞു. രാധാകിഷൻ റാവുവിനെ ഏപ്രിൽ 12 വരെ ജുഡീഷ്യൽ കസ്‌റ്റഡിയിൽ റിമാൻഡ് ചെയ്‌തു.
മാർച്ച് 23ന് വിവിധ ഇലക്ട്രോണിക് ഗാഡ്‌ജെറ്റുകളിൽ നിന്നുള്ള ഇൻ്റലിജൻസ് വിവരങ്ങൾ മായ്‌ച്ചതിനും മുൻ ബിആർഎസ് സർക്കാരിൻ്റെ കാലത്ത് ഫോൺ ചോർത്തൽ നടത്തിയതിനും ഹൈദരാബാദ് പൊലീസ് നേരത്തെ അറസ്‌റ്റ് ചെയ്‌ത ഡി പ്രണീത് റാവുവിനെ കൂട്ടുപിടിച്ചുവെന്നാരോപിച്ച രണ്ട് അഡിഷണൽ പൊലീസ് സൂപ്രണ്ടുമാർ അറസ്‌റ്റിലായിരുന്നു.
മാർച്ച് 13 ന്, നിരവധി ആളുകളുടെ പ്രൊഫൈലുകൾ വികസിപ്പിക്കുകയും അവരെ രഹസ്യമായി നിരീക്ഷിക്കുകയും, അംഗീകാരമില്ലാതെയും നിയമവിരുദ്ധമായും, ചില കമ്പ്യൂട്ടർ സംവിധാനങ്ങളും ഔദ്യോഗിക ഡാറ്റയും നശിപ്പിച്ചതിനും പ്രതിയായ പ്രണീത് റാവുവിനെ അറസ്‌റ്റ് ചെയ്‌തിരുന്നതായി പൊലീസ് പറഞ്ഞു.
കേസിൻ്റെ അന്വേഷണത്തിൻ്റെ ഭാഗമായി, മുൻ എസ്ഐബി മേധാവി ടി പ്രഭാകർ റാവു, അന്നത്തെ കമ്മിഷണറുടെ ടാസ്‌ക് ഫോഴ്‌സിലെ ഡെപ്യൂട്ടി പൊലീസ് കമ്മിഷണർ പി രാധാകിഷൻ റാവു, ഒരു തെലുഗു ടിവി ചാനലിൻ്റെ മുതിർന്ന എക്‌സിക്യൂട്ടീവ് എന്നിവർക്കെതിരെ പൊലീസ് അടുത്തിടെ ലുക്കൗട്ട് സർക്കുലർ (എൽഒസി) പുറപ്പെടുവിച്ചിരുന്നു.
കേസിൽ അന്വേഷണത്തിന് ലഭ്യമല്ലാത്തതിനാലും സഹകരിക്കാത്തതിനാലുമാണ് ഇവർക്കെതിരെ ലുക്കൗട്ട് സർക്കുലർ പുറപ്പെടുവിച്ചതെന്നും ഇവർ വിദേശത്തേക്ക് കടന്നതായി സംശയിക്കുന്നതായും പൊലീസ് പറഞ്ഞിരുന്നു. പ്രണീത് റാവുവിനെ അടുത്തിടെ തെലങ്കാന സർക്കാർ സസ്‌പെൻഡ് ചെയ്‌തിരുന്നു. മുൻ ബിആർഎസ് ഡിസ്പെൻസേഷൻ കാലത്ത് ഡിഎസ്‌പി ആയിരുന്ന അദ്ദേഹം പിന്നീട് ഡയറക്‌ടർ ജനറൽ ഓഫ് പൊലീസ് (ഡിജിപി) ഓഫിസിൽ ജോലി ചെയ്യുകയായിരുന്നു. പ്രതിപക്ഷ പാർട്ടി നേതാക്കളുടെ ഫോൺ ചോർത്തിയ സംഭവത്തിൽ നേരത്തെയും ഇയാൾക്കെതിരെ ആരോപണങ്ങൾ ഉയർന്നിരുന്നു.
മാർച്ച് 10 ന് എസ്ഐബിയുടെ അഡിഷണൽ പൊലീസ് സൂപ്രണ്ട് നൽകിയ പരാതിയുടെ അടിസ്ഥാനത്തിൽ, ഒരു പൊതുപ്രവർത്തകൻ ക്രിമിനൽ വിശ്വാസ വഞ്ചന, തെളിവുകൾ നഷ്‌ടപ്പെടുത്തൽ, ക്രിമിനൽ ഗൂഢാലോചന, ഐപിസി, പിഡിപിപി ആക്‌ട്, ഐടി ആക്‌ട് - 2000 എന്നിവയുടെ മറ്റ് വകുപ്പുകൾ ചുമത്തി പ്രണീത് റാവുവിനും മറ്റുള്ളവർക്കുമെതിരെ പഞ്ചഗുട്ട പൊലീസ് സ്‌റ്റേഷനിൽ കേസ് രജിസ്‌റ്റർ ചെയ്‌തിട്ടുണ്ട്.
ചില കമ്പ്യൂട്ടർ സംവിധാനങ്ങളും എസ്ഐബിയുടെ ഔദ്യോഗിക വിവരങ്ങളും നശിപ്പിച്ചതിനാണ് ഇവർക്കെതിരെ കേസ് രജിസ്‌റ്റർ ചെയ്‌തിരിക്കുന്നത്, കൂടാതെ ഇയാൾ രഹസ്യമായും അനധികൃതമായും മറ്റുള്ളവരുമായി ഒത്തുചേർന്ന് തെറ്റായ നേട്ടമുണ്ടാക്കാൻ ശ്രമിച്ചുവെന്നും പൊലീസ് പറഞ്ഞു.
മാത്രമല്ല ഇവർ ചില വ്യക്തികളുടെ പ്രൊഫൈലുകൾ വികസിപ്പിക്കുകയും അവരെ നിരീക്ഷിക്കുകയും, എസ്ഐബിയുടെ ഫിസിക്കൽ, ഇലക്ട്രോണിക് രേഖകൾ അപ്രത്യക്ഷമാക്കുകയും രഹസ്യാന്വേഷണ വിവരങ്ങൾ വ്യക്തിഗത ഡ്രൈവുകളിലേക്ക് പകർത്തുകയും ചെയ്‌തതായും പൊലീസ് പറഞ്ഞു.
ALSO READ : ഒഡിഷയിൽ നിന്ന് കടത്തിയ 459 കിലോ കഞ്ചാവ് പിടികൂടി ; 6 പേർ അറസ്റ്റില്‍
