ന്യൂഡല്‍ഹി: വഖഫ് ഭേദഗതി ബില്‍ പരിശോധിക്കുന്ന സംയുക്ത പാര്‍ലമെന്‍ററി സമിതിയുടെ റിപ്പോര്‍ട്ട് തയാറായി. വ്യാഴാഴ്‌ച റിപ്പോര്‍ട്ട് സ്‌പീക്കര്‍ ഓം ബിര്‍ളയ്ക്ക് സമര്‍പ്പിക്കും. പ്രതിപക്ഷാംഗങ്ങള്‍ അടക്കം ഉയര്‍ത്തിയ ആശങ്കകള്‍ ഉള്‍പ്പെടുത്തിക്കൊണ്ടുള്ള ഭേദഗതികള്‍ വരുത്തുകയും ഇതിന് അംഗീകാരം നല്‍കുകയും ചെയ്‌തതായി സമിതിയംഗം ജഗദംബിക പാല്‍ അറിയിച്ചു. പതിനൊന്നിനെതിരെ പതിനഞ്ച് വോട്ടുകള്‍ക്കാണ് ബില്ലിലെ ഭേദഗതികള്‍ പാസാക്കിയത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
നേരത്തെ സ്വീകരിച്ച ബില്ലിനെതിരെ പ്രതിപക്ഷാംഗങ്ങള്‍ ശക്തമായ വിമര്‍ശനമാണ് ഉയര്‍ത്തിയത്. ബിൽ ഭരണഘടനാ വിരുദ്ധമാണെന്നും മതകാര്യങ്ങളില്‍ സര്‍ക്കാര്‍ ഇടപെടല്‍ സാധ്യമാകുന്നതോടെ അത് വഖഫ് ബോര്‍ഡിനെ തകര്‍ക്കുമെന്നുമുള്ള ആരോപണവും ഇവര്‍ ഉയര്‍ത്തി.
പ്രതിപക്ഷാംഗങ്ങള്‍ അടക്കം ഉയര്‍ത്തിയ പല ആശങ്കകളുടെയും അടിസ്ഥാനത്തില്‍ വരുത്തിയ ഭേദഗതികള്‍ക്ക് സമിതി അംഗീകാരം നല്‍കിയിരിക്കുന്നുവെന്ന് ജഗദംബിക പാല്‍ അവകാശപ്പെട്ടു. പുതുക്കിയ ബില്‍ വഖഫ് ബോര്‍ഡിന്‍റെ ഉത്തരവാദിത്തങ്ങള്‍ സുതാര്യമായും കാര്യക്ഷമമായും നടപ്പാക്കാന്‍ സഹായകമാകുമെന്നും അദ്ദേഹം കൂട്ടിച്ചേര്‍ത്തു.
മുസ്‌ലിങ്ങളുടെ ജീവകാരുണ്യ പ്രവര്‍ത്തനങ്ങള്‍ക്കായി രൂപീകരിച്ചിട്ടുള്ള വഖഫിന്‍റെ ഗുണങ്ങള്‍ ആദ്യമായി പിന്നാക്ക മുസ്‌ലിങ്ങള്‍ക്കും പാവങ്ങള്‍ക്കും സ്‌ത്രീകള്‍ക്കും അനാഥര്‍ക്കും ലഭ്യമാക്കാന്‍ പോകുന്നുവെന്നും അദ്ദേഹം ചൂണ്ടിക്കാട്ടി.
റിപ്പോര്‍ട്ട് വ്യാഴാഴ്‌ച ലോക്‌സഭ സ്‌പീക്കര്‍ ഓം ബിര്‍ളയ്ക്ക് സമര്‍പ്പിക്കും. അനന്തരനടപടികള്‍ ലോക്‌സഭ തീരുമാനിക്കും. ഈ മാസം 31ന് ആരംഭിക്കുന്ന ബജറ്റ് സമ്മേളനത്തില്‍ ബില്‍ പാസാക്കുമോയെന്ന ചോദ്യം ഉയര്‍ന്നപ്പോഴായിരുന്നു അദ്ദേഹത്തിന്‍റെ ഈ മറുപടി.
കഴിഞ്ഞ വര്‍ഷം ഓഗസ്‌റ്റ് എട്ടിന് രൂപീകരിച്ച സമിതി രാജ്യതലസ്ഥാനത്ത് 38 യോഗങ്ങള്‍ ചേര്‍ന്നിരുന്നു. സമിതി നിരവധിയിടങ്ങള്‍ സന്ദര്‍ശിച്ച് ഇതുമായി ബന്ധപ്പെട്ടവരില്‍ നിന്ന് അഭിപ്രായങ്ങള്‍ തേടുകയും ചെയ്‌തു.
കോണ്‍ഗ്രസ്, ഡിഎംകെ, ടിഎംസി, എഎപി, എഐഎംഎം തുടങ്ങിയ കക്ഷികളിലെ പ്രതിപക്ഷ എംപിമാര്‍ ജഗദംബ പാലിന്‍റെ നേതൃത്വത്തിലുള്ള സമിതിയുടെ പ്രവര്‍ത്തനങ്ങളെ നിശിതമായി വിമര്‍ശിച്ചിരുന്നു. ചിലര്‍ തങ്ങളുടെ വിയോജിപ്പ് ശക്തമായി രേഖപ്പെടുത്തി. ചിലര്‍ ഇന്ന് വൈകുന്നേരം നല്‍കിയിരിക്കുന്ന സമയപരിധി അവസാനിക്കും മുമ്പ് വിയോജിപ്പ് അറിയിക്കും.
655 പേജുള്ള റിപ്പോര്‍ട്ടാണ് തയാറാക്കിയിട്ടുള്ളത്. ഇത് ചൊവ്വാഴ്‌ച വൈകിട്ടാണ് സമിതിയംഗങ്ങള്‍ക്ക് ലഭിച്ചത്. അത് കൊണ്ട് തന്നെ ഇതേക്കുറിച്ച് പഠിക്കാന്‍ കുറഞ്ഞ സമയം മാത്രമാണ് കിട്ടിയിട്ടുള്ളത്. സമിതിയുടെ നിഗമനങ്ങളും ശുപാര്‍ശകളും തികച്ചും വൈരുദ്ധ്യാത്മകമാണെന്ന് ടിഎംസി എംപി കല്യാണ്‍ ബാനര്‍ജി ചൂണ്ടിക്കാട്ടി. നിര്‍ദ്ദിഷ്‌ട നിയമം വഖഫ് ബോര്‍ഡുകളെ തകര്‍ക്കുമെന്നും ഇവയില്‍ സര്‍ക്കാരിന്‍റെ ഇടപെടലുണ്ടാകുമെന്നും ഒവൈയ്‌സി ചൂണ്ടിക്കാട്ടി.
ഭേദഗതികള്‍ ഭരണഘടനാ വിരുദ്ധമാണെന്ന് കോണ്‍ഗ്രസ് എംപി സയീദ് നസീര്‍ ഹുസൈന്‍ ചൂണ്ടിക്കാട്ടി. ബില്‍ ന്യൂനപക്ഷങ്ങളെ ലക്ഷ്യം വയ്ക്കുന്നതാണ്. ബിജെപിക്കും എന്‍ഡിഎയ്ക്കും കൃത്യമായ ഭൂരിപക്ഷമുള്ള പാര്‍ലമെന്‍റിന്‍റെ ഇരുസഭകളും ബില്‍ പാസാക്കിയാല്‍ ഇതിനെ തങ്ങള്‍ സുപ്രീം കോടതിയില്‍ നേരിടുമെന്ന് ഡിഎംകെയുടെ എ രാജ വ്യക്തമാക്കി.
വഖഫ് ബോര്‍ഡുകളില്‍ സുതാര്യതയും കൃത്യതയും ഉറപ്പ് വരുത്താനാണ് നിര്‍ദ്ദിഷ്‌ട ബില്‍ ലക്ഷ്യമിടുന്നതെന്ന് ബിജെപി എംപി തേജസ്വി സൂര്യ പറഞ്ഞു. ഇത് മുസ്‌ലിം സമുദായത്തെ ശാക്തീകരിക്കുമെന്നും അദ്ദേഹം കൂട്ടിച്ചേര്‍ത്തു. വഖഫ് വസ്‌തുക്കള്‍ ഇപ്പോള്‍ ഉപയോഗിച്ചിരിക്കുന്നവരുടെ ഉടമസ്ഥാവകാശം ചോദ്യം ചെയ്യാതിരിക്കാനുള്ള വഖഫ് ബൈ യൂസര്‍ വകുപ്പും നിര്‍ദ്ദിഷ്‌ട നിയമത്തില്‍ ഉള്‍പ്പെടുത്തിയിട്ടുണ്ട്. ഇത് നീക്കാനുള്ള വകുപ്പും വഖഫ് വസ്‌തുക്കളെ കുറിച്ചുള്ള നിര്‍വചനവും ഉള്‍പ്പെടുത്തണമെന്നും സംയുക്ത സമിതിയുടെ കരടില്‍ പറയുന്നു.
അമുസ്‌ലിങ്ങളെ വഖഫില്‍ ഉള്‍പ്പെടുത്തുമ്പോള്‍ അവര്‍ ഗുണഭോക്താക്കളോ തര്‍ക്കങ്ങളിലെ കക്ഷികളോ വഖഫ് കാര്യങ്ങളില്‍ താത്പര്യമുള്ളവരോ ആയിരിക്കണമെന്നും വ്യവസ്ഥയുണ്ട്. തര്‍ക്കങ്ങളില്‍ അന്വേഷണ അധികാരം ജില്ലാ കളക്‌ടര്‍ക്കായിരിക്കും. സര്‍ക്കാരുമായി ആകുമ്പോള്‍ അതിനായി പ്രത്യേക ഉദ്യോഗസ്ഥനെ ചുമതലപ്പെടുത്തേണ്ടതുണ്ടെന്നും ബില്ലില്‍ ചൂണ്ടിക്കാട്ടുന്നു.
വഖഫ് ഭേദഗതി ബില്‍ സംയുക്ത പാര്‍ലമെന്‍ററി സമിതിക്ക് വിട്ടത് 2024 ഓഗസ്‌റ്റിലാണ്. ലോക്‌സഭയില്‍ കേന്ദ്ര ന്യൂനപക്ഷകാര്യമന്ത്രി കിരണ്‍ റിജിജു ബില്‍ അവതരിപ്പിച്ചതിന് തൊട്ടുപിന്നാലെയാണ് പാര്‍ലമെന്‍ററി സമിതിക്ക് വിട്ടത്. 1995 ലെ വഖഫ് നിയമം ഭേദഗതി ചെയ്യാനുള്ള ബില്ലാണിത്. വഖഫ് വസ്‌തുവകകളുടെ നടത്തിപ്പ് സംബന്ധിച്ചുള്ള വെല്ലുവിളികള്‍ പരിഹരിക്കുക എന്നതാണ് ഉദ്ദേശ്യം.
