പ്രയാഗ്രാജ്: ഉത്തർപ്രദേശിലെ മഹാകുംഭമേളക്കിടെ തിക്കിലും തിരക്കിലുംപെട്ട്‌ 30 പേർ മരിച്ച ദാരുണാപകടം ഞെട്ടിക്കുന്നതാണ്. സംഭവത്തിൽ പ്രമുഖരടക്കം അനുശോചനം രേഖപ്പെടുത്തുകയും മരിച്ചവരുടെ കുടുംബങ്ങൾക്ക് സർക്കാർ 25 ലക്ഷം രൂപ ധനസഹായം പ്രഖ്യാപിക്കുകയും ചെയ്‌തിരുന്നു. ഭക്തർക്കിടയിൽ ആശങ്ക വേണ്ടെന്ന നിർദേശവും സർക്കാർ നൽകിയിട്ടുണ്ട്.
മൗനി അമാവാസി ദിവസം പുലർച്ചെ ഒന്നിനും രണ്ട് മണിക്കും ഇടയിലാണ് ദുരന്തം ഉണ്ടായത്. സ്‌നാനം നടത്താൻ തീർഥാടകർ തടിച്ച് കൂടിയതോടെ തിരക്ക് നിയന്ത്രണാതീതമാവുകയായിരുന്നു. കോടിക്കണക്കിന് ഭക്തരാണ് അന്നേ ദിവസം സ്‌നാനത്തിനെത്തിയത്. നിലവിൽ സ്ഥിതിഗതികള്‍ സാധാരണ നിലയിലെത്തിയിട്ടുണ്ട്. ഇത്തരത്തിൽ അനിഷ്‌ട സംഭവങ്ങള്‍ ഉണ്ടാവാതിരിക്കാൻ ശ്രദ്ധിക്കേണ്ടതുണ്ട്. ഭയം കാരണം പുണ്യസ്ഥലങ്ങളിൽ പങ്കെടുക്കാതിരിക്കുന്നതിന് പകരം ചില കാര്യങ്ങള്‍ ശ്രദ്ധിച്ചാൽ വലിയ അപകടങ്ങള്‍ ഒഴിവാക്കാവുന്നതാണ്. കുംഭമേളയ്‌ക്ക് പോകുന്നവർക്കായി സർക്കാരും ജുന അഖാര തലവൻ സ്വാമി അവധേശാനന്ദ് ഗിരിയും നൽകിയ പ്രത്യേക നിർദേശങ്ങള്‍ നോക്കാം.
- സംഗം സ്‌നാനത്തിൽ തന്നെ സ്‌നാനം ചെയ്യണമെന്ന് നിർബന്ധം പിടിക്കരുത്. ഇത് വലിയ തിരക്കിന് കാരണമാകുന്നു. സൗകര്യ പ്രദമായ സ്ഥലത്ത് സ്‌നാനം ചെയ്‌ത് മടങ്ങുക.
- ആൾക്കൂട്ടം കുറവുള്ള സ്ഥലങ്ങളിൽ എല്ലാവരും കുളിക്കണം. തിരക്കേറിയ സ്ഥലങ്ങളിൽ പോകരുതെന്നും പ്രത്യേകം ശ്രദ്ധിക്കുക. ഗംഗ, യമുന, സരസ്വതി എന്നീ നദികളുടെ സാമീപ്യം എല്ലായിടത്തുമുണ്ട്. സംഗമത്തിൻ്റെ 15 കിലോമീറ്റർ ചുറ്റളവിൽ എവിടെ വേണമെങ്കിലും സ്‌നാനം ചെയ്യാവുന്നതാണ്.
- പരസ്‌പരം സഹകരത്തോടെ തീർഥാടനം നടത്തുക. തർക്കങ്ങള്‍ ഒഴിവാക്കുക. പരസ്‌പരം ഉണ്ടാകുന്ന തർക്കം അപകടത്തിൻ്റെ ആക്കം കൂട്ടും. ആൾക്കൂട്ടം കുറവുള്ള പ്രദേശത്ത് തീർഥാടനം നടത്തുക.
- രോഗികളായ മുതിർന്നവരെയും കുട്ടികളെയും കൊണ്ടു വരുന്നത് പരമാവധി ഒഴിവാക്കാൻ ശ്രമിക്കുക. സംഗം സ്ഥാനത്തേക്ക് വലിയ ജനക്കൂട്ടം ഉണ്ടെങ്കിൽ കഴിവതും പോകാതെ ഇരിക്കുക. സംഗം സ്‌നാനത്തിനുള്ള ജലം വീട്ടിലേക്ക് കൊണ്ട് പോയാൽ മതിയാകും.
- സ്‌നാനത്തിന് ശേഷം ഘാട്ടിൽ സമയം ചെലവഴിക്കുന്നത് ഒഴിവാക്കുക. പിന്നിൽ നിന്ന് വരുന്ന ഭക്തർക്ക് സ്‌നാനം ചെയ്യാൻ അവസരം നൽകണം. അതിനാൽ എത്രയും വേഗം ഘാട്ട് വിടാൻ ശ്രമിക്കുക. ആശ്രമത്തിലോ വിശ്രമ സ്ഥലങ്ങളിലോ വിശ്രമിക്കാൻ ശ്രമിക്കുക.
- അനാവശ്യ പ്രചാരണങ്ങളിൽ വീഴരുത്. അധികൃതരുടെ വാക്കുകള്‍ക്ക് പ്രാധാന്യം നൽകുക. വ്യാജ പ്രചാരണങ്ങളിൽ വിശ്വസിക്കുന്നവർ വലിയ അപകടങ്ങളിൽപെടാനോ അനാവശ്യ ആശങ്കകളിൽ പെടാനോ സാധ്യതയുണ്ട്.
- ലഗേജ് വഹിച്ചുള്ള തീർഥയാത്ര ഒഴിവാക്കുക. കുളിക്കാൻ ആവശ്യമായ വസ്‌ത്രങ്ങള്‍ മാത്രം എടുത്താൽ മതിയാകും.
- മഹാകുംഭ മേളയിലെ മണലിൽ ഉറങ്ങരുത്. ധാരാളം ആളുകള്‍ സംഗമത്തിൽ വന്ന് പ്രാർഥിച്ച ശേഷം മണലിൽ ഉറങ്ങാറുണ്ട്. ഇത് അപകടം വിളിച്ച് വരുത്തും. ജനക്കൂട്ടവും തിരക്കും കൂടാൻ കാരണമാവുകയും ചെയ്യും.
- സ്വർണ്ണം, വെള്ളി ആഭരണങ്ങൾ, വിലയേറിയ മൊബൈലുകൾ മുതലായവ കൊണ്ടുപോകുന്നത് ഒഴിവാക്കുക. മോഷ്‌ടാക്കളെ ശ്രദ്ധിക്കുക
ഭക്തരുടെ സൗകര്യാർഥം അധികൃതർ നിരവധി ഹെൽപ്പ് ലൈൻ നമ്പറുകള്‍ നൽകിയിട്ടുണ്ട്. ന്തെങ്കിലും പ്രശ്‌നമുണ്ടായാൽ ഈ ഹെൽപ്പ് ലൈൻ നമ്പറിലേക്ക് വിളിക്കുക.
- മുഖ്യമന്ത്രിയുടെ ഹെൽപ്പ് ലൈൻ നമ്പർ: 1076
- വനിതാ പവർ ലൈൻ: 1090
- പൊലീസ് എമർജൻസി സർവീസ്: (112)
- ഫയർ സർവീസ്: 101
- പ്രയാഗ്രാജ് നഗർ ഹെൽപ്പ് ലൈൻ: 1920
- ആംബുലൻസ് സർവീസ്: 108
- വനിതാ ശിശു ഹെൽപ്പ് ലൈൻ: 1098
- പൊലീസിൻ്റെ ഹെൽപ്പ് ലൈൻ നമ്പർ: 1944
- ഗർഭിണികൾക്കും നവജാതശിശുക്കൾക്കുമുള്ള ഹെൽപ്പ് ലൈൻ നമ്പർ: 102
- യുപി ഹെൽപ്പ് ലൈൻ നമ്പർ: 18001802877
- വാട്ട്സ്ആപ്പ് നമ്പർ: 9415049606
Also Read: 'നദീജലം അമൃതാകും'; മഹാ കുംഭമേളയുടെ പ്രാധാന്യവും ഐതിഹ്യവുമറിയാം
