തിരുവനന്തപുരം: തിരുവനന്തപുരം ഡിസിസി പ്രസിഡന്‍റ് പാലോട് രവിക്കെതിരെ പരസ്യമായ താക്കീതുമായി എഐസിസി ജനറൽ സെക്രട്ടറി കെസി വേണുഗോപാൽ. പുനസംഘടന കടലാസിൽ മാത്രം പോരെന്നും താഴെ തട്ടിൽ പ്രവർത്തനമാണ് ആവശ്യമെന്നും പാലോട് രവിയെ പേരെടുത്തു പറഞ്ഞു വേദിയിൽ വിമർശിച്ചു.
തദ്ദേശ തെരഞ്ഞെടുപ്പിന് മുന്നോടിയായി തിരുവനന്തപുരത്ത് നടന്ന വാർഡ് പ്രസിഡന്‍റുമാരുടെ യോഗവും മഹാത്മാ ഗാന്ധി രക്തസാക്ഷി ദിനവും ഉദ്ഘാടനം ചെയ്‌തു സംസാരിക്കുകയായിരുന്നു അദ്ദേഹം. വാർഡ് സമിതിയെ പുനസംഘടിപ്പിച്ചത് കടലാസിൽ ഉണ്ടായിട്ടു കാര്യമില്ലെന്നും നാട്ടിലെ വീടുകളിൽ പോകണമെന്നും കെ സി വേണുഗോപാൽ പറഞ്ഞു.
ഒരു വർഷക്കാലത്തെ ഗൃഹ സന്ദർശന പരിപാടികൾ നടത്തണം. മാസത്തിൽ ഒരു തവണ എങ്കിലും വീടുകൾ സന്ദർശിക്കണം. പ്രവർത്തനമില്ലാതെ നേതാവാകാൻ കഴിയില്ലെന്ന് ഉറപ്പ് വരുത്തണം. ജനവുമായി ബന്ധമില്ലാതെ നേതാവാകേണ്ട. അഭിപ്രായ വ്യത്യാസങ്ങൾ എല്ലാക്കാലത്തുമുള്ള പാർട്ടിയാണ് കോൺഗ്രസ്‌. രാഷ്ട്രീയ എതിരാളികളെ നേരിടാൻ ഒരുമിച്ചിറങ്ങണം. മണ്ഡലം പ്രസിഡന്‍റിന് മണ്ഡലത്തിലെ കാര്യങ്ങളിൽ ഉത്തരവാദിത്വം വേണംമെന്നും അദ്ദേഹം വിമർശിച്ചു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
പാർട്ടി വിട്ടവരെ തിരികെ ക്ഷണിക്കണം, തമ്മിൽ ഫിനിഷ് ചെയ്യാൻ നിന്നാൽ മൊത്തം ഫിനിഷാകും
ചെറിയ പിണക്കങ്ങളിൽ കോൺഗ്രസ്‌ പാർട്ടി വിട്ടവരെ തിരികെ ക്ഷണിക്കണമെന്നും കെ സി വേണുഗോപാൽ വ്യക്തമാക്കി. അവരെ കാണുന്നതിൽ തെറ്റില്ല. അവരെ തിരികെ വരാൻ ക്ഷണിക്കാം. ചെറിയ പരിഭവങ്ങൾ പരിഹരിക്കണം. ഒറ്റക്കെട്ടായി നിന്നു തദ്ദേശ തെരഞ്ഞെടുപ്പിനെ നേരിടണമെന്നും അദ്ദേഹം ചൂണ്ടിക്കാട്ടി.
തമ്മിൽ ഫിനിഷ് ചെയ്യാമെന്ന് കരുതിയാൽ നമ്മളെ ഫിനിഷ് ചെയ്യാൻ അപ്പുറത്ത് വേറെ ആളുണ്ടെന്ന് മനസിലാക്കണം. വാർഡ് കമ്മിറ്റിക്ക് ഇനി മുതൽ പരിപാടികൾ കൊടുക്കണം. വാർഡ് കമ്മിറ്റികളിൽ സജീവമായവരെ സ്ഥാനാർഥി നിർണയത്തിൽ പരിഗണിക്കണം. വിജയിച്ചവർക്ക് പാർട്ടിയിൽ കൂടുതൽ അവസരം നൽകണം. തോൽപ്പിക്കുന്നവർക്ക് പാർട്ടിയിൽ സ്ഥാനമുണ്ടാകില്ലെന്നും കെ സി വേണുഗോപാൽ വാർഡ് പ്രസിഡന്‍റുമാരുടെ യോഗത്തിൽ വ്യക്തമാക്കി.
Also Read:വിദ്യാർഥികളേ... വരൂ സംരംഭകരാകാം; ജെൻ - Z നായി കുടുംബശ്രീയുടെ കെ ബിസിനസ്
