ഹൈദരാബാദ്: തങ്ങളുടെ ഏറ്റവും പുതിയ സ്മാർട്ട് വാച്ചായ റെഡ്‌മി വാച്ച് 5 ലൈറ്റ് വിപണിയിൽ അവതരിപ്പിച്ച് ഷവോമി. 1.96 ഇഞ്ച് സ്‌ക്രീൻ, AMOLED ഡിസ്‌പ്ലേ, ജിപിഎസ് ട്രാക്കർ, ഹാർട്ട് റേറ്റ് മോണിറ്ററിങ് തുടങ്ങിയ നിരവധി ഫീച്ചറുകളോടെയാണ് പുതിയ വാച്ച് പുറത്തിറക്കിയിരിക്കുന്നത്. കറുപ്പ്, ലൈറ്റ് ഗോൾഡൻ നിറങ്ങളിൽ റെഡ്‌മി വാച്ച് 5 ലൈറ്റ് വിപണിയിൽ ലഭ്യമാണ്. പുതിയ മോഡലിന്‍റെ വിലയും മറ്റ് സവിശേഷതകളും പരിശോധിക്കാം.
600 നിറ്റ് ബ്രൈറ്റ്‌നെസും 1.96 ഇഞ്ച് നീളമുള്ള ഡിസ്‌പ്ലേയും ഉള്ള AMOLED സ്‌ക്രീനിലാണ് ഈ സ്‌മാർട്‌വാച്ച് രൂപകൽപന ചെയ്‌തിരിക്കുന്നത്. വാച്ചിൽ ബിൽറ്റ്-ഇൻ ജിപിഎസ് ട്രാക്കർ നൽകിയിട്ടുണ്ട്. ഫിറ്റ്‌നസിൽ താത്‌പര്യമുള്ളവർക്ക് കൂടുതൽ പ്രയോജനമാവുന്ന രീതിയിലാണ് വാച്ച് രൂപകൽപ്പന ചെയ്‌തിരിക്കുന്നത്.
നിരവധി പ്രൊഫഷണൽ സ്‌പോർട്‌സ് മോഡുകളും ബിൽറ്റ്-ഇൻ റണ്ണിങ് കോഴ്‌സുകളും, ഓട്ടം, ഹൈക്കിങ്, സൈക്ലീങ് തുടങ്ങിയ ഫിറ്റ്‌നെസ് പ്രവർത്തനങ്ങൾക്ക് കൃത്യമായ ട്രാക്കിങ് നൽകുന്നതിനുള്ള സംവിധാനവും പുതിയ വാച്ചിലുണ്ട്. ഹൃദയമിടിപ്പ് നിരീക്ഷിക്കാനുള്ള സംവിധാനവും പുതിയ സ്‌മാർട്‌ഫോണിലുണ്ട്. അതിനാൽ തന്നെ ഫിറ്റ്‌നെസ് ഇഷ്‌ട്ടപ്പെടുന്നവർക്ക് റെഡ്‌മി വാച്ച് 5 ലൈറ്റ് പ്രയോജനപ്പെടുമെന്നതിൽ സംശയമില്ല.
ഫീച്ചറുകൾ:
- ഡിസ്‌പ്ലേ: 1.96 ഇഞ്ച്, 410 x 502 പിക്‌സൽ റെസല്യൂഷൻ, AMOLED ഡിസ്‌പ്ലേ, 600 nits ബ്രൈറ്റ്‌നെസ്
- ഹാർട്ട് റേറ്റ് മോണിറ്ററിങ്
- ജിപിഎസ് ട്രാക്കർ
- ആക്‌സിലറോമീറ്റർ
- ഗൈറോസ്കോപ്പ്
- ബിൽറ്റ്-ഇൻ അലക്‌സ
- കോളിങിനായി ബിൽറ്റ്-ഇൻ മൈക്രോഫോൺ, സ്‌പീക്കർ
- കോളുകൾക്കായി 2 മൈക്ക് ഇഎൻസി
- ക്ലോക്ക് ട്രാക്കിങ്, സ്ലീപ്പ് ആൻഡ് സ്ട്രെസ് മോണിറ്ററിങ്
- പിരീഡ് സൈക്കിൾ മോണിറ്ററിംഗ്
- 5ATM 50 മീറ്റർ വാട്ടർ റെസിസ്റ്റൻ്റ്
- ബാറ്ററി: 470mAh ബാറ്ററി, 18 ദിവസം വരെ ബാറ്ററി ബാക്കപ്പ്
- കളർ ഓപ്‌ഷനുകൾ: കറുപ്പ്, ലൈറ്റ് ഗോൾഡൻ
- വില: 3,999 രൂപ
നിരവധി ആകർഷകമായ ഫീച്ചറുകളോടെയാണ് റെഡ്‌മി വാച്ച് 5 ലൈറ്റ് വിപണിയിൽ അവതരിപ്പിച്ചിരിക്കുന്നത്. നിങ്ങളുടെ പ്രധാനപ്പെട്ട ജോലികൾ ട്രാക്ക് ചെയ്യുന്നതിനായി കലണ്ടർ സജ്ജീകരിക്കാനും വാച്ചിൽ കഴിയും. സാധാരണ ഉപയോഗത്തിൽ 18 ദിവസം വരെ ബാറ്ററി ബാക്കപ്പ് ലഭിക്കും. അമിതമായി ഉപയോഗിക്കുകയാണെങ്കിൽ ബാറ്ററി 12 ദിവസം പ്രവർത്തിക്കും. വാച്ച് 5ATM 50 മീറ്റർ വാട്ടർ റെസിസ്റ്റൻ്റ് കപ്പാസിറ്റി ഉള്ളതിനാൽ തന്നെ വാച്ച് ധരിച്ച് നീന്താനാകും. 10 മിനിറ്റ് വരെ വാച്ച് വെള്ളത്തെ ചെറുത്തുനിൽക്കും. നീന്തൽ ട്രാക്കിങിനും ഈ വാച്ച് ഉപയോഗപ്രദമാകും. ബ്ലൂടൂത്തുമായി കണക്‌ട് ചെയ്യാവുന്ന വാച്ച് വഴി കോൾ ചെയ്യാനും മെസേജ് അയക്കാനും സാധിക്കും. ഇത് ഫോണിന്‍റെ എല്ലായ്‌പ്പോഴുമുള്ള ഉപയോഗത്തെ കുറയ്‌ക്കും.
റെഡ്‌മി വാച്ച് 5 ലൈറ്റിന് ബിൽറ്റ്-ഇൻ അലക്‌സയുണ്ട്. കൂടാതെ സ്‌പോർട്‌സ് മോഡ്, നൈറ്റ് മോഡ്, ഡിഎൻഡി മോഡ്, തിയേറ്റർ മോഡ്, വാട്ടർ ക്ലിയറിങ് മോഡ് എന്നിങ്ങനെ നിരവധി മോഡുകളും റെഡ്‌മി വാച്ച് 5 ലൈറ്റിൽ ലഭ്യമാണ്. 3,999 രൂപയാണ് റെഡ്‌മി വാച്ച് 5 ലൈറ്റിന്‍റെ വില. mi.com വെബ്‌സൈറ്റിൽ ഓഫർ വിലയിൽ വാച്ച് ലഭ്യമാകും.
Also Read: മികച്ച മൈലേജ്: കിടിലൻ ഫീച്ചറുകളുമായി പുതിയ മാരുതി സ്വിഫ്‌റ്റ് സിഎൻജി ഇന്ത്യൻ വിപണിയിൽ
