ഹൈദരാബാദ്: ഓപ്പോയുടെ പ്രീമിയം സ്‌മാർട്ട്‌ഫോൺ വിഭാഗത്തിലേക്ക് ഒരാൾ കൂടി. ഓപ്പോ ഫൈൻഡ് എക്‌സ് 8 സീരീസിൽ അടുത്തിടെ പുറത്തിറങ്ങിയ ഫൈൻഡ് എക്‌സ് 8, ഫൈൻഡ് എക്‌സ് 8 പ്രോ മോഡലുകൾക്ക് പിന്നാലെ അതേ ലൈനപ്പിൽ ഫൈൻഡ് എക്‌സ് 8 അൾട്രാ മോഡൽ അവതരിപ്പിക്കാനൊരുങ്ങുകയാണ് കമ്പനി. സാംസങ് ഗാലക്‌സി എസ് 25 അൾട്രാ, ഹോണർ മാജിക് 7 അൾട്ടിമേറ്റ്, ഷവോമി 15 അൾട്രാ, വിവോ എക്‌സ് 200 അൾട്രാ എന്നീ മോഡലുകൾക്ക് എതിരാളി ആയിരിക്കും വരാനിരിക്കുന്ന ഓപ്പോ ഫൈൻഡ് എക്‌സ് 8 അൾട്രാ.
ഫോണിന്‍റെ ലോഞ്ചിങ് തീയതി വെളിപ്പെടുത്തിയിട്ടില്ലെങ്കിലും, അടുത്ത വർഷം ആദ്യം തന്നെ പുറത്തിറക്കാനാണ് സാധ്യത. 2024 ജനുവരിയിൽ പുറത്തിറങ്ങിയ ഓപ്പോ ഫൈൻഡ് എക്‌സ് 7 അൾട്രായുടെ പിൻഗാമിയായി ഓപ്പോ ഫൈൻഡ് എക്‌സ് 8 അൾട്രാ എത്തുമെന്നാണ് പ്രതീക്ഷിക്കുന്നത്. ലോഞ്ചിങിന് മുന്നോടിയായി ഫോണിന്‍റെ നിരവധി സവിശേഷതകൾ ചോർന്നിരിക്കുകയാണ്. 120 Hz റിഫ്രഷ് റേറ്റുള്ള 6.82 ഇഞ്ച് 2കെ ഡിസ്‌പ്ലേ, എക്‌സ്-ആക്‌സിസ് ഹാപ്‌റ്റിക് മോട്ടോർ, ഐപി69 റേറ്റിങ്, അൾട്രാസോണിക് ഫിംഗർപ്രിൻ്റ് സെൻസർ തുടങ്ങിയ ഫീച്ചറുകൾ ഫോണിൽ ഉണ്ടായിരിക്കാനാണ് സാധ്യത.
ചൈനീസ് സോഷ്യൽ മീഡിയ പ്ലാറ്റ്‌ഫോമായ വെയ്‌ബോ ആണ് ഓപ്പോയുടെ പുതിയ ഫോണിന്‍റെ സവിശേഷതകൾ വെളിപ്പെടുത്തിയത്. 2K റെസല്യൂഷനോട് കൂടിയ 6.82 ഇഞ്ച് ക്വാഡ് കർവ് സ്‌ക്രീനാണ് ഫോണിലുള്ളതെന്നാണ് റിപ്പോർട്ടുകൾ. ഡിസ്‌പ്ലേയിൽ തന്നെ അൾട്രാസോണിക് ഫിംഗർപ്രിൻ്റ് സെൻസർ സജ്ജീകരിക്കാനാണ് സാധ്യത. കൂടാതെ പൊടിയെയും വെള്ളത്തെയും പ്രതിരോധിക്കുന്നതിനായി IP68, IP69 റേറ്റിങ് ഉണ്ടായിരിക്കും.
മോട്ടോർ ഓയിൽ, ലൂബ്രിക്കന്‍റുകൾ പോലുള്ള ഉയർന്ന മർദ്ദത്തിലുള്ള ദ്രാവകങ്ങളെ പ്രതിരോധിക്കാനും ഫോണിനാവും. 6,000mAh കപ്പാസിറ്റിയുള്ള ബാറ്ററിയും 80W അല്ലെങ്കിൽ 90W ഫാസ്റ്റ് ചാർജിങും ഫോൺ പിന്തുണയ്‌ക്കുമെന്നാണ് സൂചന. ചോർന്ന വിവരങ്ങളനുസരിച്ച് ഓപ്പോ ഫൈൻഡ് എക്‌സ് 8 അൾട്രാ ക്വാൽകോമിന്‍റെ ഏറ്റവും പുതിയ സ്‌നാപ്‌ഡ്രാഗൺ 8 എലൈറ്റ് പ്രോസസറിലായിരിക്കും പ്രവർത്തിക്കുകയെന്നാണ് സൂചന.
50 എംപി പ്രൈമറി സെൻസർ, 50 എംപി അൾട്രാ വൈഡ് സെൻസർ, 3x ഒപ്റ്റിക്കൽ സൂമുള്ള 50 എംപി പെരിസ്‌കോപ്പ് ടെലിഫോട്ടോ ലെൻസ്, 6x ഒപ്റ്റിക്കൽ സൂമുള്ള 50 എംപി പെരിസ്‌കോപ്പ് ടെലിഫോട്ടോ ലെൻസ് എന്നിങ്ങനെയാണ് ക്യാമറ സജ്ജീകരണം. 2025ൻ്റെ ആദ്യ പാദത്തിൽ തന്നെ ഓപ്പോ ഫൈൻഡ് N5 ലോഞ്ച് ചെയ്യുമെന്നാണ് പ്രതീക്ഷിക്കുന്നത്. ഓപ്പോ ഫൈൻഡ് എക്‌സ് 8 അൾട്രയുടെ കൂടുതൽ വിവരങ്ങൾ ലോഞ്ചിന് മുന്നോടിയായി കമ്പനി തന്നെ വെളിപ്പെടുത്തും.
Also Read:
- ഓപ്പോയുടെ പ്രീമിയം ഫോണെത്തി; ആപ്പിളിനും സാംസങിനും എതിരാളിയായി ഫൈൻഡ് എക്‌സ് 8 സീരീസ്
- മികച്ച വാട്ടർപ്രൂഫ് കപ്പാസിറ്റിയുമായി റിയൽമിയുടെ പുതിയ ഫോൺ: ലോഞ്ച് ഡിസംബർ 18ന്
- 10,000 രൂപയാണോ ബജറ്റ്? മികച്ച 5ജി സ്‌മാർട്ട്‌ഫോണുകളും സവിശേഷതകളും
- ഗെയിമിങ് സ്‌മൂത്താകും, ഒപ്പം ബജറ്റും: ചുരുങ്ങിയ ചെലവിൽ വാങ്ങാവുന്ന അഞ്ച് മികച്ച ഗെയിമിങ് സ്‌മാർട്ട്‌ഫോണുകൾ
- 200 എംപി ക്യാമറ, ഇത് പൊളിക്കും: കിടിലൻ ക്യാമറയുമായി വിവോ X200 സീരീസിൽ രണ്ട് ഫോണുകൾ
