Vadodara School Fire : वडोदराच्या शाळेला लागली आग, 500 मुलांना सुखरुप बाहेर काढण्यात यश

वडोदा: गुजरातमधील वडोदरा शहरातील एका बहुमजली शाळेच्या इमारतीला शुक्रवारी शॉर्ट सर्किटमुळे आग लागली आणि इमारतीत धुराचे लोट पसरले. मात्र, सुमारे 500 विद्यार्थ्यांना वेळीच इमारतीतून बाहेर काढण्यात आले. मकरपुरा अग्निशमन केंद्राचे उप अग्निशमन अधिकारी जयदीप गाढवी यांनी सांगितले की, शहरातील मकरपुरा भागातील फिनिक्स शाळेत माध्यमिक आणि वरिष्ठ माध्यमिक वर्गातील विद्यार्थी वर्गात असताना आग लागली. शाळेची इमारत तळमजल्याव्यतिरिक्त चार मजले असून प्रत्येक मजल्यावर चार वातानुकूलित वर्गखोल्या असल्याची माहिती त्यांनी दिली. तिसऱ्या मजल्यावरील एमसीबीच्या स्विचबोर्डमध्ये शॉर्ट सर्किट झाल्याने आग लागल्याचे आमच्या लगेच लक्षात आले, असे त्यांनी सांगितले. ज्वाळा किरकोळ होत्या, मात्र दाट धुराच्या लोटाने तिसऱ्या मजल्यावर पूर्णपणे विळखा घातला होता.