राजमाता जिजाऊ जयंती 2024; मातृतिर्थ सिंदखेड राजात अभिवादनासाठी शिवप्रेमींची तुफान गर्दी

बुलडाणा Rajmata Jijau Jayanti 2024 : हिंदवी स्वराज्याचे संस्थापक छत्रपती शिवाजी महाराज यांच्या मातोश्री राजमाता जिजाऊ यांची आज 426 वी जयंती मातृतिर्थ सिंदखेड राजा इथल्या राजे लखोजी जाधव यांच्या राजवाड्यात साजरी करण्यात येत आहे. राजमाता जिजाऊ यांचा जन्म 12 जानेवारीला सिंदखेडराजा इथ राजे लखोजीराव जाधव यांच्या राजवाड्यात झाला होता. त्यानिमित्त राजे लखुजीराव जाधव यांच्या राजवाड्यावर आकर्षक विद्युत रोषणाई करण्यात आली. तर राजमाता जिजाऊंचं जन्मस्थळ आकर्षक पुष्पहारांनी सजवण्यात आलं आहे. महिला आणि पुरुष यांनी भगवे फेटे परिधान करून 'तुमचं आमचं नातं काय जय जिजाऊ जय शिवराय' अशा घोषणा देत सकाळपासूनच राजमाता जिजाऊंना अभिवादन करण्यासाठी नागरिक गर्दी करत आहेत.  

सकाळीच राजे लखोजीराव जाधव यांच्या वंशजांनी राजमाता जिजाऊंची आरती करुन वंदन केलं. त्यानंतर राजवाडा परिसरात फटाक्यांची आतिशबाजी करत जन्मोत्सव सोहळा साजरा करण्यात आला.  आज सकाळी सहा वाजता राज्याच्या कानाकोपऱ्यातून राजमाता जिजाऊंना अभिवादन करण्यासाठी मोठ्या संख्येनं नागरिक गर्दी करत आहेत. आज सकाळी सहा वाजता शेतकरी नेते रविकांत तुपकर हे सिंदखेड राजा इथं दाखल झाले. त्यांनी राजमाता जिजाऊंना वंदन करुन "छत्रपती शिवरायांनी सर्वप्रथम शेतकऱ्यांचा विचार करत शेतकरी जगला पाहिजे, शेतकरी जगला तर संपूर्ण जग सुखी होईल." असं त्यांनी राजमाता जिजाऊंच्या चरणी मनोगत व्यक्त केलं.