यवतमाळ - अवकाळी पावसाने शेती उद्ध्वस्त झाल्याने शेतकरी गर्भगळीत झाला आहे. या परिस्थितीत विमा कंपन्यांनी दावा मंजुरीकरीता शेतकऱ्यांची नाहक अडवणूक केल्यास विमा कंपन्या व त्यांच्या प्रतिनिधींना सोडणार नाही, असा निर्वाणीचा इशारा महसूल राज्यमंत्री संजय राठोड यांनी दिला. राठोड यांनी वाशिम जिल्ह्यातील कारंजा, मानोरा तालुक्यासह यवतमाळ जिल्ह्यातील दिग्रस, दारव्हा, नेर तालुक्यात नुकसानग्रस्त शेतीची पाहणी करून शेतकऱ्यांना शासनाकडून सरसकट मदत देण्याची ग्वाही दिली.
हेही वाचा - मारेगाव येथील बेपत्ता तरुणाचा मृतदेह आढळला वणीत; खून झाल्याचा संशय
गेल्या आठ दिवसांपासून सातत्याने पाऊस सुरू असल्याने नुकसानीचे क्षेत्र वाढत असून शेतकरी पूर्णपणे उद्ध्वस्त झाला आहे. शेतकऱ्यांच्या या नुकसानीची वर्गवारी करता येणार नसून सर्व शेतकऱ्यांना सरसकट मदत देणे हाच पर्याय आहे. शेतकऱ्यांना सरसकट मदत मिळावी हीच शासनाचीही भूमिका असल्याने शेतकऱ्यांनी नुकसानीचे छायाचित्रे घेऊन साध्या कागदावर अर्ज केला तरी पुरेसे आहे. सोयाबीन, कापसासह आंतरपिके, फळबागा, भाजीपाला सर्वच पिकांचे आतोनात नुकसान झाल्याचे चित्र सर्वत्र आहे. नुकसानग्रस्त भागात तत्काळ पंचनामे करून सर्व शेतकऱ्यांना शासनाकडून मदत मिळवून देऊ, असा विश्वास संजय राठोड यांनी नुकसानग्रस्त भागात शेतकऱ्यांशी संवाद साधताना दिला.
शेतकऱ्यांच्या मदतीसाठी १० हजार कोटी रुपयांची तरतूद करण्याचा निर्णय घेण्यात आला. ही मदतही शेतकऱ्यांच्या बँक खात्यात येत्या तीन, चार दिवसात जमा होईल, असेही त्यांनी सांगितले. या दौऱ्यात असंख्य शेतकऱ्यांनी पीक विम्याच्या दाव्याबाबत येत असलेल्या अडचणींचा पाढा राठोड यांच्यापुढे मांडला. पाऊस सातत्याने कोसळत असल्याने नुकसानीचा अंदाज कसा बांधायचा आणि कंपन्यांनी दिलेल्या ७२ तासांच्या मुदतीत अर्ज कसा करायचा, असे प्रश्न शेतकऱ्यांनी उपस्थित केले. शिवाय कृषी विभागाने दिलेले विमा कंपनींच्या प्रतिनिधींचे मोबाईल क्रमांकही बंद असल्याचे सांगितले.
हेही वाचा - कापसाला 'हमीभाव' नाही तर 'कमीभाव'; यवतमाळ शेतकऱ्यांचा आंदोलनाचा इशारा
या नैसर्गिक संकटात विमा कंपन्या व त्यांचे प्रतिनिधी शेतकऱ्यांची नाहक अडवणूक करीत असतील तर शिवसैनिक त्यांच्या स्टाईलने समाचार घेतील आणि शासनाचा प्रतिनिधी म्हणून अशा कंपन्यांना शासनाच्या काळ्या यादीत टाकण्याची शिफारस करू. अडवणूक करणाऱ्या विमा कंपन्यांना सोडणार नाही, असा इशारा संजय राठोड यांनी दिला. त्यांनी दिग्रस तालुक्यातील कलगाव, आष्टा, दारव्हा तालुक्यातील लोही, तरणोळी, नेर तालुक्यातील नेरशिवार, वटफळी आदी गावातील नुकसानग्रस्त शेतातील पिकांची पाहणी केली.
