यवतमाळ - यवतमाळ तालुक्यातील मुरझडी चिंच या गावातून अवैधरित्या चंदनाची झाडे वाहतूक करण्यात येत असल्याची गोपनीय माहिती स्थानिक गुन्हे शाखेला मिळाली होती. त्यावरून या गावात सापळा रचून वनविभागाच्या फिरत्या पथकांनी व पोलिसांनी 95 किलो 730 ग्राम चंदन अंदाजे किंमत सात लाख 65 हजार रुपये जप्त केले आहे. यावेळी एका आरोपीस अटक करण्यात आली असून एक आरोपी फरार झाला आहे.
हेही वाचा - यवतमाळमध्ये लहान मुलांसह म्युकरमायकोसिसच्या रुग्णांसाठी वेगळ्या वॉर्डाचे नियोजन
स्थानिक गुन्हे शाखेचे पोलीस निरीक्षक प्रदीप परदेशी यांना गोपनीय माहिती मिळाली होती की, चापडोह जंगल शिवारातून चंदनाची झाडे अवैधरित्या तोडून यवतमाळ तालुक्यातील मुरझडी चिंच या गावातून तस्करी केली जात आहे. स्थानिक गुन्हे शाखेने लगेच वन विभागाचे फिरते पथक यांना माहिती देऊन मुरझडी चिंच या गावी जाऊन या गावातील गोविंद व्यवहारे यांच्या शेताजवळ सापळा रचला. या शेतातून दोन इसम पोत्यामध्ये चंदन आणत असल्याचे निदर्शनास आले. वनविभाच्या व पोलीस पथकाला पाहताच त्यांनी पळ काढला.
दोघांचा पाठलाग केला असता त्यांच्या जवळील पोत्यातून 51 चंदनाच्या झाडाचे तुकडे व चंदन झाडाचा बुंदा आढळून आला. त्यांचे मोजमाप केले असता ते 95.730 किलो इतके निघाले. हा चंदनचा साठा जप्त करण्यात आला आहे. यावेळी दशरथ सूर्यभान नोगमोते (र. वरझडी) याला अटक करण्यात आली आहे. तर, एक जण फरार झाला आहे.
जप्त केलेले चंदन 7 लाख 65 हजारांचे असल्याची माहिती वनविभागाच्या फिरथे पथकाचे वनपरिक्षेत्र अधिकारी चेतन नेहारे यांनी सांगितले. ही कारवाई स्थानिक गुन्हे शाखा आणि वनविभागाने संयुक्तरित्या केली आहे. फरार आरोपीचा शोध सुरू आहे.
