वाशिम - जिल्ह्यातील काजळेश्वर येथील जि.प. मराठी केंद्रशाळेच्या मुख्य इमारतीचा व्हरांडा शिकस्त झाला असून, खांब तुटल्याने इमारत मोडकळीस आली आहे. त्यामुळे विद्यार्थ्यांच्या जीवाला धोका होऊ नये म्हणून प्रशासनाने वेळीच खबरदारी घ्यावी, अशी मागणी सामाजिक कार्यकर्ते आणि गावकऱ्यांकडून केली जात आहे.
काजळेश्वर येथील जि.प. प्राथमिक मराठी शाळेत १ ते ४ पर्यंत वर्ग असून विद्यार्थी संख्या ११८ आहे. शाळेत मुख्याधापक यांच्यासह दोन शिक्षक, चार शिक्षिका, केंद्र प्रमूख असा कर्मचारीवर्ग आहे. शाळेचे शैक्षणिक कार्य चांगले आहे. मात्र, ही इमारत खूप जूनी असल्यामुळे ती धोकादायक झाली आहे. व्हराड्यातील आधाराचे खांब मोडकळीस आले आहेत, त्यातील एक खांब तुटल्यामूळे पत्र्याचे शेड वाकले आहे. अशा अवस्थेत विद्यार्थ्यांना इजा होऊ नये किंवा अथवा कोणतीही दुर्घटना घडू नये, याची काळजी जि.प. प्रशासनाने घ्यावी अशी मागणी पालकांकडून करण्यात येत आहे.
