दोन मुलांना फाशी देऊन आईनेही संपवले जीवन; सुसाईड नोटच्या आधारे तपास सुरू

वाशिम जिल्ह्यात आईने तिच्या दोन मुलांना फाशी देऊन स्वत: फाशी घेतल्याची ह्रदयद्रावक घटना घडली. त्या घटनेचा पोलीस तपास करत आहे. आत्महत्येचे नेमके कारण अजून समोर आले नसले तरी पोलिसांच्या हाती सुसाईड नोट लागली आहे.

वाशिम - आईने आपल्या दोन चिमुकल्यांसह स्वतः आत्महत्या केल्याची घटना जिल्ह्यातील तोंडगाव इथे घडली. या घटनेमुळे प्रत्येकाचे मन सुन्न झाले आहे. जयश्री गजानन गवारे (वय 28), गणेश गजानन गवारे (वय 05) आणि मोहित गजानन गवारे (वय 03) अशी मृतांची नावे आहेत. आत्महत्येमागचे नेमके कारण अजून समोर आलेले नाही. मात्र, तपासात पोलिसांच्या हाती सुसाईड नोट आली असल्याने त्याआधारे वाशिम ग्रामीण पोलीस तपास करत आहेत.

वाशिम तालुक्यातील तोंडगाव हे जयश्री यांचे माहेर आहे. जयश्री यांचा विवाह तालुक्यातील जांभरुण नावजी या गावातील गजानन गवारे यांच्यासोबत झाला होता. काही वर्षांच्या सुखी संसारानंतर त्यांना दोन अपत्ये झाली. त्यानंतर पती-पत्नीमधील वाद पोलिसांच्या उंबऱ्यावर पोहोचला होता. त्यामुळे जयश्री मागील काही महिन्यांपासून मुलांसह माहेरी तोंडगाव येथे वास्तव्यास होती.

सकाळी चिमुकल्यांना शाळेत पाठविण्याची तयारी सुरू असताना जयश्री यांनी दोन्ही चिमुकल्यांना फाशी दिली. त्यानंतर स्वत:ही घराच्या छताला गळफास लावून आत्महत्या केली. या घटनेची माहिती मिळताच ग्रामीण पोलिसांनी घटनास्थळ गाठून पंचनाम्यानंतर मृतदेह उत्तरीय तपासणीसाठी हलविले होते. मात्र, आता जयश्रीने लिहिलेली सुसाईड नोट पोलिसांच्या हाती लागली आहे. तसेच तिच्या भावाने दिलेल्या माहितीच्या आधारे पोलिसांनी तपास सुरू केला आहे.

पोलिसांनी तपास केल्यानंतरच आत्महत्येमागचे नेमके कारण समोर येणार आहे. याप्रकरणी पोलिसांनी मुलांची हत्या केल्याप्रकरणी तिच्यावर हत्येचा गुन्हा दाखल केला आहे. तर तिच्या मृत्यू प्रकरणी आकस्मिक मृत्यूची नोंद केली आहे. या घटनेमुळे परिसरात हळहळ व्यक्त केली जात आहे.