वर्धा - सोशल मीडियावर राष्ट्रीय स्वयंसेवक संघाच्या नावे एक सर्व्हे व्हायरल झाला आहे. यामध्ये राष्ट्रीय स्वयंसेवक संघाच्या लेटर हेडचा वापर करण्यात आला आहे. या लेटरहेडवर विधानसभेसाठी भाजपच्या इच्छुक उमेदवारांना असलेल्या जातीनिहाय पसंतीचा सर्व्हे आहे. संघाच्यावतीने याची पोलिसात तक्रार दाखल करण्यात आली आहे.
या प्रकाराने भाजपमधील राजकीय वातावरण चांगलेच तापले आहे. सदर प्रकरण हे विद्यमान आमदार पंकज भोयर यांच्याविरोधात केलेला खोडकरपणा असल्याचे भाजपकडून सांगितले जात आहे.
व्हायरल झालेल्या या सर्व्हेमध्ये आमदार पंकज भोयर यांना तिसऱ्या क्रमांकाची पसंती दाखवली गेली आहे. पहिल्या क्रमांकावर माजी खासदार सुरेश वाघमारे आहेत. हा खोडकरपणा असून असा सर्व्हे संघ करत नसल्याचे वाघमारे म्हणाले. भाजपच्या मीडिया सेलच्यावतीनेही पोलिसात तक्रार देण्यात आली आहे.
हेही वाचा - जागावाटपाचा तिढा भारत-पाकिस्तानच्या 'फाळणी'पेक्षाही कठीण - संजय राऊत
लेटरहेडवर राष्ट्रीय स्वयंसेवक संघाच्या दिल्ली कार्यालयाचा पत्ता असून २० सप्टेंबर २०१९ अशी तारीख लिहलेली आहे. वर्धा विधानसभा मतदारसंघ जाती आणि उमेदवार असा तक्ताही आहे. वेगवेगळ्या चार क्रमांकांवरून हे सर्व्हेक्षण व्हॅाट्सअ‍ॅपला व्हायरल केल्यानंतर हे क्रमांक बंद करण्यात आले.
राष्ट्रीय स्वयंसेवक संघाकडून अशा प्रकारचे सर्व्हेक्षण केले जात नाही. संघाची प्रतिमा मलिन करण्यासाठी खोडकर वृत्तीतून हा प्रकार घडवून आणला गेला आहे, अशी माहिती नगर संघचालक प्रसाद देशमुख यांनी दिली.
