वर्धा - अवैध वाहतूक करणाऱ्या ट्रकमुळे हकनाक बालकाचा मृत्यू झाल्याची घटना हिंगणघाट तालुक्यातील वणी येथे घडली. ट्रकच्या धडकेत सोमवारी रात्री सहा वर्षांच्या मुलाचा जागीच मृत्यू झाला. सोहम दूधपोहे असे मृत बालकाचे नाव आहे. त्याची आजी सिंधू दूधपोहे यांचा थोडक्यात जीव वाचला आहे.
सोहम दूधपोहे हा मूळचा कोसूरला येथील रहिवासी आहे. आजीसोबत लहान वाणी येथे नरेश भडंगे यांच्याकडे तो सुट्टीसाठी आला होता. जेवण झाल्यावर रस्त्याच्याकडेला आजीसोबत तो पायी फेरफटका मारत होता. याच वेळी ट्रक ( महा २९ टी १०५९) हा बोरगाव घाटातून रेती भरून वर्ध्याला वणीमार्गे जात होता. वणी येथील गावात असलेल्या गतिरोधक वाचविण्याच्या प्रयत्नात रस्त्याच्या बाजूला असलेल्या सोहमला भरधाव ट्रकने चिरडले. यात सोहमचा जागीच मृत्यू झाला झाला. त्याची आजी सिंधू दूधपोहे यांचा जीव थोडक्यात वाचला आहे. संबंधितांनी आर्थिक मदत केल्याने सोहमचे पार्थिव नातेवाईकांनी ताब्यात घेतल्याचे सांगण्यात आले.
गावात पोलीस आणि दंगलनियंत्रण पथक दाखल-
हिंगणघाट पोलिसांना घटनेची माहिती मिळताच एसडीपीओ भीमराव टेळे यांच्यासह हिंगणघाट पोलीस घटनास्थळी दाखल झाले. गावातील नागरिकांचा असंतोष पाहता दंगल नियंत्रण पथकालादेखील प्राचारण करण्यात आले आहे. याचबरोबर समुद्रपूरचे पोलीस प्रवीण मुंडे, वडणेरचे पोलीस आशिष गजभिये, हिंगणघाटचे सहायक पोलीस निरीक्षक सचिन यादव, जोसना गिरी यांच्यासह पोलिसांचा मोठा बंदोबस्त ठेवण्यात आला आहे. अतिरिक्त पोलीस अधीक्षक निखिल पिंगळे हे हिंगणघाट पोलीस ठाण्यात दाखल झाले.
अवैध रेती वाहतुकीचा 'बळी' ठरला 'सोहम' -
हिंगणघाट तालुक्यातील नांदगाव बोरगाव, सोनेगाव(धोटे), बीड नगाजी, पारडी हे घाट आहेत. यातील घाटांवर अनधिकृतरीत्या बोट आणि जेसीबीच्यासाह्याने वाळूचा उपसा केला जात आहे. मात्र यावर महसूल विभागाची मेहरेनजर असल्याने रात्री चोरून रेती वाहतूक करण्यात येते. त्याचाच सोहम हा बळी ठरला आहे.
