ठाणे - आगामी लोकसभा निवडणुकीच्या पार्श्वभूमीवर मतदार नोंदणीपासून वंचित राहिलेल्या ठाणे जिल्ह्यातील नागरिकांच्या मतदार नोंदणीसाठी शनिवार व रविवारी विशेष मोहीम घेण्यात आली. या मोहिमेला चांगला प्रतिसाद मिळाला. या २ दिवसात सुमारे १५ हजार नवीन नोंदणीचे अर्ज स्वीकारण्यात आल्याची माहिती निवडणूक शाखेने दिली.
विशेष म्हणजे १८ आणि १९ वयोगटातील १३,१३६ अर्ज स्वीकारण्यात आले. बेलापूर येथे सर्वाधिक म्हणजे २११२ अर्ज घेण्यात आले. तर मुंब्रा कळवा येथे सर्वात कमी म्हणजे ३८३ अर्ज आले. गेल्या आठवड्यात झालेल्या पहिल्या टप्प्यातील मोहिमेत १० हजार नवीन नाव नोंदणीसाठी अर्ज आले होते. १ जानेवारी २०१९ या अर्हता दिनांकावर अंतिम मतदार याद्या प्रसिद्ध करण्यात आल्या आहेत. यामध्ये मतदार नोंदणीपासून वंचित नागरिकांना आणखी एक संधी मिळावी या उद्देशाने ही विशेष मोहीम राबविण्यात आली.
सर्व अर्ज उपलब्ध
दोन्ही दिवशी सर्व मतदान केंद्रांच्या ठिकाणी मतदान केंद्रस्तरीय अधिकारी (बीएलओ) नागरीकांकडून नाव नोंदणीसाठी अर्ज स्वीकारत होते. शिवाय बीएलओंकडे देखील नमुना क्र. ६, ७, ८ व ८ अ चे अर्ज उपलब्ध होते. नागरीकांनी आपले नाव मतदार यादीत तपासण्यासाठी वेबसाईट व १९५० हेल्पलाईनचा देखील उपयोग केला.
जिल्हाधिकारी यांच्याकडून पाहणी
जिल्हाधिकारी राजेश नार्वेकर यांनी काल काही मतदान केंद्रांवर भेटी देऊन या मोहिमेची पाहणी केली तसेच चर्चाही केली. विशेषतः दिव्यांग मतदारांसाठी रॅम्प, लिफ्ट, व्हील चेअर आदी विविध सुविधा असल्याची खात्री त्यांनी केली. त्यांच्यासमवेत तहसीलदार निवडणूक सर्जेराव म्हस्के पाटील होते. उप जिल्हा निवडणूक अधिकारी अपर्णा सोमाणी आरोलकर यांनी देखील जिल्ह्यातील काही मतदान केंद्रांना भेटी दिल्या.
