खळबळजनक..! कोविड रुग्णालयातून रुग्ण महिलेचे मंगळसूत्र लांबविले, ठाण्यातील दुसरी घटना

डोंबिवली पूर्वेतील महापालिकेच्या जिमखाना कोविड रुग्णालयात कोरोनावर उपचार घेत असलेल्या एका महिलेच्या गळ्यातील मंगळसूत्र अज्ञात चोरट्याने लंपास केले आहे. याबाबत टिळक नगर पोलीस ठाण्यात गुन्हा दाखल झाला आहे.

ठाणे - डोंबिवली पूर्वेतील महापालिकेच्या जिमखाना कोविड रुग्णालयात विचित्र प्रकार चव्हाट्यावर आला आहे. या रुग्णालयात अतिदक्षता विभागात उपचार घेणाऱ्या एका वृद्ध रुग्ण महिलेच्या गाळ्यातील सोन्याचे मंगळसूत्र चोरट्याने लंपास केल्याच्या वृत्ताने रुग्णासह नातेवाईकांमध्येही भीतीचे वातावरण निर्माण झाले आहे. महापालिका हद्दीत कोरोनाने बाधित झालेल्या रुग्णांवर उपचार करण्यासाठी ठिकठिकाणी कोविड रुग्णालय उभारण्यात आली आहेत. विशेष म्हणजे या रुग्णालयात बाहेरील कोणासही प्रवेश दिला जात नाही. तरीही अशा रुग्णालयातून दुसऱ्यांदा दागिने लंपास झाल्याचा प्रकार समोर आल्याने कोविड रुग्णालयाच्या सुरक्षेते बाबतचा प्रश्न उपस्थित झाला आहे.

रेमडेसिवीरच्या इंजेक्शनमुळे गाढ झोप लागली अन...

संबंधित रुग्ण महिला कल्याण पश्चिम परिसरातील खडकपाडा भागात राहते. त्यांना 1 डिसेंबरपूर्वी कोरोनाचे निदान झाल्याने त्यांना उपचारासाठी डोंबिवलीतील कोविड जिमखाना रुग्णालयात दाखल करण्यात आले. त्यांच्यावर अतिदक्षता विभागात उपचार सुरू असताना येथील डॉक्टरांनी त्यांना 1 डिसेंबरच्या रात्री रेमडेसिवीरचे इंजेक्शन दिले. त्यामुळे त्यांना गाढ झोप लागली होती. याचाच फायदा घेऊन रुग्णालयातील अज्ञताने त्यांच्या गळ्यातील 33 हजार रुपये किंमतीचे मंगळसूत्र लंपास केले. विशेष कोविड रुग्णालयात बाधीत रुग्णांवर उपचार होत असल्याने तेथे डॉक्टर, परिचारिका, वॉर्डबॉय, सफाई कामगाऱ्यांच्या व्यतिरिक्त अन्य कोणालाही प्रवेश देण्यात येत नाही. अतिदक्षता विभागात सुरक्षेच्या कारणामुळे इतर कोणालाही जाण्याची परवानगी नाही. उपचार घेत असलेली महिला कोरोनामुक्त होऊन घरी परतली. मात्र, तिच्या गळ्यातील मंगळसूत्र नसल्याचे निदर्शनास येताच महिलेच्या मुलाने टिळक नगर पोलीस ठाण्यात तक्रार दिली आहे. यावरुन अज्ञात चोरट्याविरोधात गुन्हा दाखल झाला आहे.

यापूर्वीही घडली अशी घटना

कल्याणच्या गोविंदवाडीतील आसरा फाउंडेशन या कोविड सेंटरमध्ये उपचार घेणाऱ्या एका महिलेकडील 50 हजार रुपये किंमतीची अडीच तोळ्यांची सोन्याची चेन, 30 हजार रुपये किंमतीचे प्रत्येकी 6 ग्रॅम वजनाचे कानातील दोन झुमके, 15 हजार रुपये किंमतीच्या प्रत्येकी 3 ग्रॅम वजनाच्या झुमक्यांच्या 3 पट्ट्या, आणि 2 हजार रूपये रोख रक्कम, असा 97 हजारांचा ऐवज ऑक्टोबर महिन्यात चोरीस गेला होता. त्यावेळी याबाबत त्या महिलेच्या मुलाने बाजारपेठ पोलीस ठाण्यात तक्रार दिली होती.

हेही वाचा - आमदारच्या कार अपघातात २ जणांच्या मृत्यू प्रकरणी वाहन चालकाची जामिनावर मुक्तता

हेही वाचा - नाशिक-मुंबई महामार्गावर गॅस टँकर शेतात पलटला; गॅस गळतीच्या भीतीने लोकांमध्ये घबराट