मीरा भाईंदर (ठाणे) - गेले काही दिवस मीरा भाईंदर शहराचा पाणी पुरवठा विस्कळीत झाला असून नागरिकांना त्रास सहन करावा लागत आहे. पाणी प्रश्नावर आज (दि. 19 ऑक्टोबर) मंत्रालयात राज्याचे उद्योगमंत्री सुभाष देसाई यांनी बैठक बोलावली होती. मीरा भाईंदर शहरासाठी 135 एमएलडी पाणी आरक्षित आहे. या मंजूर कोट्याप्रमाणे संपूर्ण पाणी मीरा भाईंदरला देण्याचा निर्णय या बैठकीत घेण्यात आला. तांत्रिक बाबींची पूर्तता करून येत्या काही दिवसात हे वाढीव पाणी मीरा भाईंदर शहराला मिळेल, असे सांगण्यात आले. पुढच्या काही महिन्यात आणखी 20 एमएलडी पाणी मीरा भाईंदरला देण्याबाबतही बैठकीत चर्चा झाली.
मीरा भाईंदरमध्ये अपुऱ्या पाण्याने लोकांचे हाल होत आहेत. पाणी प्रश्नावर तोडगा काढण्याची मागणी होत होती. यासाठी काही दिवसापूर्वी आमदार प्रताप सरनाईक, गीता जैन, महापौर जोस्ना हसनाळे यांनी राज्याचे उद्योग मंत्री सुभाष देसाई यांची भेट तर पत्र देऊन मीरा भाईंदरच्या पाणी प्रश्नावर बैठक आयोजित करण्याची विनंती केली होती. त्यानुसार मंत्री सुभाष देसाई यांनी आज (सोमवार) मंत्रालयातील संबंधित अधिकाऱ्यांची बैठक बोलावली होती. उद्योग विभागाच्या अंतर्गत 'एमआयडीसी'च्या मंजूर कोट्यातून मीरा भाईंदरला पाणी पुरवले जाते.
मीरा भाईंदर शहराला 'एमआयडीसी'कडून सध्या 100 एमएलडीच्या आसपास पाणी मिळत आहे. प्रत्यक्षात 135 एमएलडी इतके पाण्याचे आरक्षण जलसंपदा विभागाकडून मीरा भाईंदरसाठी आहे. त्यामुळे संपूर्ण मंजूर असलेले 135 एमएलडी पाणी मीरा भाईंदरला द्यावे व त्याशिवाय अतिरिक्त किमान 25 एमएलडी पाणी मीरा भाईंदर शहरासाठी मंजूर करावे. म्हणजेच त्याची मंजुरी व पाणी वितरित करण्याची व्यवस्था करावी, अशी विनंती आमदार प्रताप सरनाईक यांनी बैठकीत केली. त्याबाबत बैठकीत चर्चा झाली. मीरा भाईंदर शहराला वाढीव पाणी देणे गरजेचे आहे. शहराची लोकसंख्या सतत वाढत आहे. त्यामुळे एमआयडीसीकडून मंजूर कोट्याप्रमाणे पाणी देण्याबाबत कार्यवाही करावी अशा सूचना सुभाष देसाई यांनी दिल्या.
राज्याच्या जलसंपदा विभागाकडून मीरा भाईंदरसाठी 135 एमएलडी पाणी आरक्षित आहे. मात्र, प्रत्यक्षात तेवढे पाणी मीरा भाईंदरला मिळत नाही. या मंजूर कोट्याप्रमाणे पाणी मीरा भाईंदरला मिळावे, अशा सूचना या बैठकीत देण्यात आल्याने पाण्याची स्थिती नक्कीच सुधारेल, असे अधिकाऱ्यांनी सांगितले.
हेही वाचा - गणेश नाईक म्हणतात, 'मी शेतकऱ्यांचा आमदार नाही...'
