ठाणे - मागील दोन दिवसांपासून सुरू असलेल्या पावसामुळे मुंबई, ठाणे आणि सभोवतालच्या परिसरात जनजीवन विस्कळीत झाले आहे. याचा सर्वात जास्त फटका पश्चिम आणि मध्य रेल्वेला बसला आहे.
सतत कोसळणाऱ्या पावसामुळे मध्य रेल्वेची वाहतूक खोळंबली आहे. त्यामुळे लाखो प्रवाशांचे हाल सुरू आहेत. सकाळपासून बंद असलेली रेल्वे वाहतूक अजुनही पूर्णपणे सुरळीत झालेली नाही. कल्याणपासून कर्जत-कसारापर्यंत जाणारे रेल्वे मार्ग खुले झाल्यामुळे वाहतूक सुरू करण्यात आली आहे. त्रस्त प्रवाशांना थोडासा दिलासा मिळाला आहे. मध्य रेल्वेची सेवा ठप्प असल्याने प्रवाशांना इतर पर्यायी वाहनांचा वापर करावा लागला.
हेही वाचा - गणेशोत्सवाला पावसाचा फटका; मंडपामध्ये शिरले पाणी
हार्बर मार्गावर रेल्वे रूळांवर पाणी साचल्यामुळे रेल्वे वाहतूक बंद झाली होती. लोकल सेवा बंद झाल्यामुळे पर्यायी व्यवस्था म्हणून प्रवासी मोनो रेल्वेचा वापर करत आहेत. मात्र, अचानक प्रवासी संख्या वाढल्याने मोनो रेल्वेच्या तिकिटांसाठी गर्दी मोनो रेल्वे स्थानकांत पहायला मिळत आहे.
