ठाणे - गुडविन ज्वेलर्सने वाढीव व्याजाचे आमिष दाखवून करोडो रुपयांची फसवणूक केली. त्यानंतर गुडविन ज्वेलर्स विरूद्ध फसवणुकीचे गुन्हे दाखल करण्यात आले. याप्रकरणी ठाणे आर्थिक गुन्हे शाखेने केलेल्या तपासात पोलिसांना धक्कादायक माहिती मिळाली आहे. गुडविन ज्वेलर्सचे संचालक सुनील कुमार आणि सुधीश कुमार यांनी पूर्वतयारी करूनच सर्व दुकानांना टाळे लावले आहे. मात्र, या सर्व पैशाचे काय केले, याचा तपास होणे बाकी आहे. पोलिसांनी या संदर्भात अनेक बँक खाती गोठवण्याची प्रक्रिया सुरू केली असून त्याचा तपास केल्यावरच ग्राहकांच्या पैशाचा हिशोब लागणार आहे.
गुडविन ज्वेलर्सची ठाण्यासह डोंबिवली आणि अंबरनाथ या परिसरात चार दुकाने आहेत. त्यापैकी सील केलेल्या तीन दुकानांचे कुलूप तोडून त्या दुकानांची तपासणी प्रक्रिया पूर्ण झाली आहे. साधारणत: एका दुकानात सहा-सात तास केलेल्या तपासणीत तीन दुकानांमधून गोल्ड कोटेड दागिने मिळून आले आहेत. त्यांची अंदाजे किंमत दीड लाखांच्या आसपास आहे. यावरून हा घोटाळा आधीच शिजला असल्याची माहिती पुढे आली आहे.
पोलिसांना या छापा सत्रात सोन्याचे खोटे दागिने मिळाले आहेत. त्यामुळे हे दागिने जाणून बुजून ठेवल्याचे स्पष्ट झाले आहे. यावरून या कटात कोण-कोण सहभागी आहे, याचा देखील शोध घेतला जात आहे. यासाठी सीसीटीव्हीची तपासणी होणार आहे आणि आवश्यकता वाटल्यास त्याचा पुरावा म्हणून वापर होणार आहे. सुरुवातीला काही ग्राहकांना जास्त व्याजाचा परतावा करून गुडविन ज्वेलर्सचे संचालक सुनील कुमार आणि सुधीश कुमार यांनी नंतर नागरिकांची करोडो रुपयांनी फसवणूक केली आहे.
पैशाचे केले काय, हाच तपासाचा मुख्य भाग
या घोटाळ्याच्या मागे कोणते कारण होते, याचा आता शोध घेतला जात असून एवढ्या मोठ्या प्रमाणात ठेवी घेऊन त्या पैशाचे काय केले, याचा शोध ठाणे आर्थिक गुन्हे शाखा घेणार आहे. बँकेच्या व्यवहारावरून पुढील तपास होणार असून त्यासाठी आवश्यक माहितीचे पत्र ठाणे पोलिसांकडून बँकांना पाठवले जाणार आहे.
हेही वाचा- वर्चस्वाच्या वादातून तृतीयपंथीयांच्या दोन गटात राडा
