ठाणे - 'आम्ही भारतीय लोक'च्या नागरिकत्व कायद्याविरोधी आंदोलनाला पोलिसांनी परवानगी नाकारली होती. तरीही आंदोलकांनी डॉ. बाबासाहेब आंबेडकर उद्यानामध्ये येऊन केंद्र सरकारच्या विरोधात घोषणाबाजी केली. तसेच भारतीय संविधानाच्या प्रस्तावनेचे वाचन केले. यावेळी पोलिसांचा मोठा बंदोबस्त तैनात करण्यात आला होता.
हेही वाचा - भिवंडीत बैल चोरणाऱ्या त्रिकुटाला जमावाची बेदम मारहाण, एकाचा मृत्यू
नागरिकत्व कायद्याविरोधात 'आम्ही भारतीय लोक' आंदोलन समितीतर्फे कल्याणच्या डॉ. बाबासाहेब आंबेडकर उद्यानमध्ये 1 फेब्रुवारीपासून धरणे आंदोलन करण्यात येणार होते. विशेष म्हणजे या आंदोलनाला कल्याणातील वकिलांच्या बार संघटनेने पाठिंबा दिला होता. मात्र, धरणे आंदोलन टाळण्यासाठी महात्मा फुले चौक पोलिसांनी महानगरपालिकेला आंदोलनासाठी उद्यान देऊ नये असे पत्र दिले. परिणामी, महापालिकेने उद्यान देण्यास नकार दिल्यानंतर आंदोलनकर्त्यांनी पत्रकार परिषद घेऊन पोलिसांवर नाराजी व्यक्त केली होती.
धरणे आंदोलनासाठी समितीच्या पदाधिकाऱ्यांनी 8 दिवसापूर्वी कल्याण-डोंबिवली महानगरलिका व महात्मा फुले चौक पोलिसांकडे परवानगी मागितली होती. तसेच राज्याचे गृहमंत्री अनिल देशमुख यांची भेट घेऊन लोकशाही मार्गाने आंदोलनासाठी परवानगी मागितली होती. मात्र, पोलिसांनी परवानगी दिली नसल्याचे त्यांनी गृहमंत्री देशमुख यांना सांगतिले होते.
हेही वाचा - उल्हासनगरात रेशनच्या काळ्या बाजाराचा भांडाफोड; दक्ष नागरिकाने गहू पकडला
त्यातच आंदोलन करू नये, म्हणून समितीच्या पदाधिकाऱ्यांना 149 कलमान्वये पोलिसांनी नोटिसी बजावल्या होत्या. तरी देखील आंदोलनकर्त्यानी डॉ. बाबासाहेब आंबडेकर उद्यान्यात अंदोलन करून भारतीय संविधानाच्या प्रस्तावनेचे वाचन केले. दरम्यान, आता हे आंदोलन शिवाजी चौकात करणार असल्याचे आंदोलनकर्त्यानी सांगितले.
