Container Accident Thane: मुंबई-नाशिक महामार्गावर कंटेनर चालकाचा ताबा सुटल्याने विचित्र अपघात; एक ठार

मुंबई-नाशिक महामार्गावर एका भरधाव कंटेनर चालकाचा वाहनावरील ताबा सुटल्याने भीषण अपघात झाल्याची घटना ठाणे जिल्ह्यात घडली आहे. यामध्ये कंटेनरने दोन ते तीन दुचाकी, कार आणि टेम्पो या वाहनाला जोरदार धडक दिली. या भीषण अपघातात एकाचा जागीच मृत्यू झाला आहे. तर तीन जण गंभीर जखमी झाले असून त्यांच्यावर खासगी रुग्णालयात उपचार सुरू आहेत.

ठाणे: मौजम फायाजऊल्ल हुसेन अन्सारी (वय ३१ ) असे अपघातात मृत्यू झालेल्या तरुणाचे नाव आहे. तर चैतन्य कासने (वय २४) , नशिर अली अबु अन्सारी (वय ३३) , जयेश बाळाराम सपाट (वय २५) असे जखमींचे नावे आहेत. याप्रकरणी पडघा ग्रामीण पोलीस ठाण्यात अपघाताची नोंद करून पोलिसांनी तपास सुरू केला आहे.

असा घडला विचित्र अपघात: जिल्ह्यात दोन दिवसांपासून रात्रीच्या सुमारास पावसाची संततधार सुरू आहे. त्यातच शनिवारी रात्रीच्या सुमारास मुंबई-नाशिक महामार्गावर पडघा नजिक असलेल्या खडवली फाट्याजवळ कंटेनर चालकाचा वाहनावरील ताबा सुटला. त्यावेळी महामार्गावर समोर असलेल्या कारला मागच्या बाजूस कंटेनरने जोरदार धडक दिली. त्यानंतर या कंटेनर चालकाने कारला फरफटत नेत रस्त्याच्या कडेला असलेल्या एका आईस्क्रीमच्या टेम्पोलाही जोरदार धडक दिली. शिवाय कंटेनर चालकाने फरफटत आणलेल्या कार व आईस्क्रीमच्या टेम्पोला जोरदार धडक दिली. अपघातावेळी आईस्क्रीम खात उभे असलेले तीन ते चार जण दुचाकीसह चिरडले गेले.

कंटेनर चालक पोलिसांच्या ताब्यात: या भीषण अपघातात दोन ते तीन दुचाकी, एक कार व आईस्क्रीम टेम्पोचे मोठे नुकसान झाले असून एकाचा घटनास्थळीच मृत्यू झाला आहे. तर तीन जण या दुर्घटनेत गंभीर जखमी असून त्यांच्यावर खासगी रुग्णालयात उपचार सुरू आहेत. तर कंटेनरच्या धडकेत कारच्या मागच्या बाजूस धडक बसल्याने सुदैवाने कारमधील प्रवासी बचावले आहेत. या अपघाताची माहिती पडघा पोलिसांना मिळताच पोलीस पथक घटनास्थळी दाखल होऊन पंचनामा करत मौजम फायाजऊल्ल हुसेन अन्सारी या तरुणाचा मृतदेह ताब्यात घेतला. मृतदेह उत्तरीय तपासणीसाठी शासकीय रुग्णालयात रवाना केला. या भीषण अपघातानंतर पळून गेलेल्या कंटेनर चालकाला पडघा पोलिसांनी ताब्यात घेतले आहे. या विचित्र अपघाताची चौकशी पडघा पोलीस करीत आहेत.

हेही वाचा: