सोलापूर - कोरोना व्हायरसच्या पार्श्वभूमीवर पहिल्यांदाच ग्रामपंचायत निवडणुका पार पडत आहेत. सोलापूर जिल्ह्यामध्ये यंदा 590 ग्रामपंचायतीमध्ये निवडणूक प्रक्रिया पार पडत आहे. 4 हजार 943 सदस्य निवडणुकीच्या रिंगणात आहेत. गावचे कारभारी निवडण्यासाठी सकाळी 7.30पासून सुरुवात झाली.
केंद्र व राज्य सरकारकडून थेट निधी
गावाच्या विकासासाठी थेट ग्रामपंचायतीला निधी देण्याचे केंद्र सरकार व राज्य सरकारचे धोरण आहे. त्यामुळे जिल्हा परिषद व पंचायत समितीबरोबर ग्रामपंचायत निवडणुकीची चुरस वाढली आहे.
12 लाख 85 हजार 921 एकूण मतदार
590 ग्रामपंचायतीमध्ये 12 लाख 85 हजार 921 मतदार आहेत. जिल्ह्यातील 2 हजार 307 प्रभागामधून सदस्य निवडले जाणार आहेत. या निवडणुकीसाठी 2 हजार 325 मतदानकेंद्रे आहेत. ग्रामपंचायतिच्या निवडणुकीसाठी 11 हजार 625 कर्मचाऱ्यांची नियुक्ती करण्यात आली आहे.
सोशल डिस्टन्सिंगचे पालन करत मतदान
आज शुक्रवारी सकाळपासूनच मतदारानी मतदान केंद्रावर सोशल डिस्टन्सिंगचे पालन करत रांगा लावल्या. यावेळी पोलिसांचाही चोख बंदोबस्त असलेला पाहायला मिळत आहे. कोरोना व्हायरसच्या पार्श्वभूमीवर सर्व अटी-नियमाचे पालन करत निवडणूक अधिकारी मतदान करून घेतानाच चित्र सध्या सोलापूर जिल्ह्यामध्ये दिसत आहे.
सोमवारी मतमोजणी
आज शुक्रवारी होणाऱ्या मतदानाची मतमोजणी सोमवारी होणार आहे. तालुक्याच्या ठिकाणी मतमोजणी होणार आहे. मतमोजणीबाबतचे सर्व अधिकार तहसीलदारांना देण्यात आले आहे.
पहिल्या चार तासात 32 टक्के मतदान
जिल्ह्यातील 590 ग्रामपंचायतीसाठी सकाळपासून मतदान होत आहे. सकाळी साडेसात वाजल्यापासून चार तासांत 32 टक्के मतदान झाले आहे.
