पंढरपूर (सोलापूर) - पंढरपूर शहरात सध्या कोरोना संसर्गाची साथ झापट्याने वाढत आहे. दुसरीकडे कोरोनाचे रुग्ण बरे होण्याचे प्रमाणही वाढत आहे. आज (गुरुवार) 8 कोरोना रुग्ण बरे होऊन घरे गेले आहेत. सध्या पंढरपुरात 17 रुग्णांवर उपचार सुरू आहेत. टाळया व हरी नामाच्या गजरात त्यांना घरी सोडण्यात आले.
मागील पंधरा दिवसांमध्ये पंढरपुरात कोरोनाचा फैलाव जास्त झाला आहे. यापूर्वी आठ जण कोरोनामुक्त झाले आहेत. त्यानंतर आज आणखी आठ जणांवर यशस्वी उपचारानंतर घरी सोडण्यात आले. बुधवारी एका कोरोना रुग्णाचा मृत्यू झाला आहे. परराज्यातून तसेच परजिल्ह्यातून रेडझोनमधून आलेल्या नागरिकांमुळे तालुक्यात कोरोना संक्रमणाचा धोका निर्माण झाला आहे. आरोग्य, महसूल, पोलीस प्रशासन विभागाने तालुक्यातील परस्थिती समन्वयाने हाताळून कॉन्टॅक्ट ट्रेसिंग चांगल्या पद्धतीने केले. त्यामुळे येथील स्थिती नियंत्रणात येण्यास मदत झाली असल्याचे प्रांताधिकारी ढोले यांनी सांगितले.
पंढरपूर तालुक्यात गजानन महाराज मठ, उपजिल्हा रुग्णालय पंढरपूर आणि वाखरी कोविड केअर सेंटर येथे स्वॅब घेण्याची सुविधा निर्माण करण्यात आली आहे. तसेच रॅपिट अँटिजेन टेस्टच्या माध्यमातून तपासणी करण्यात येणार आहे. तालुक्यात आतापर्यंत 900 जणांच्या कोरोना चाचणीची तपासणी केली आहे. त्यामध्ये 166 तपासणी अहवाल प्रलबिंत आहेत, अशी माहिती तालुका आरोग्य अधिकारी डॉ.बोधले यांनी दिली आहे.
कोरोनामुक्त झालेल्या आठ जणांना निरोप देण्यासाठी प्रांताधिकारी सचिन ढोले, गटविकास अधिकारी रविकिरण घोडके, मुख्याधिकारी अनिकेत मानोरकर, उपजिल्हा रुग्णालयाच्या वैद्यकीय अधीक्षक डॉ. जयश्री ढवळे, तालुका आरोग्य अधिकारी डॉ.एकनाथ बोधले, उपजिल्हा रुग्णालयाचे डॉ. प्रदीप केचे, डॉ. धनंजय सरोदे, तसेच आरोग्य कर्मचारी उपस्थित होते.
