सोलापूर - सांगोला तालुक्यातील जुनोनी जवळ दोन पिकअप आणि मोटरसायकलचा तिहेरी अपघात झाला. या अपघातात ३ जणांचा जागीच मृत्यू तर एक जण जखमी झाला आहे. जखमींवर मिरज येथील रुग्णालयात उपचार सुरू आहेत.
अजित रंगराव तुरुटे (वय ४०), सागर रघुनाथ पडळकर (वय ३२), व अक्षय आनंदा जाधव (वय ३५ ) असे अपघातात मृत्यू झालेल्यांची नावे आहेत. मृत अजित आणि सागर हे कवठेमहांकाळ तालुक्यातील कुकटोळी येथील रहिवासी आहेत. तर तिसरा मृत व्यक्ती कुठला गावाचा रहिवाशी आहे हे अद्याप स्पष्ट झालेले नाही.
आज (बुधवार) दुपारी ४ वाजण्याच्या सुमारास हा अपघात झाला. एक पिकअप गाडी सांगोल्याहून मिरजेकडे निघाली होती. तर दुसरी पिकअप गाडी मिरजेहून सांगोल्याकडे निघाली होती. या गाड्या जुनोनी जवळ आल्यानंतर एक मोटारसायकलस्वार त्या दोन्ही गाड्यातून रस्ता पार करण्याच्या प्रयत्न केला. यात भीषण अपघात झाला आणि त्यात तीन जणांचा जागीच मृत्यू झाला.
दरम्यान, मृतदेह सांगोला येथील ग्रामीण रुग्णालयांमध्ये शवविच्छेदनासाठी पाठवण्यात आले आहेत. याबाबत अधिक तपास पोलीस करत आहेत.
