सातारा - दिवसेंदिवस सातारा जिल्ह्यातील कोरोनाग्रस्तांचा आकडा वाढत असल्याचे दिसत आहे. आरोग्य विभागाकडून काल (शनिवार) रात्री जाहीर करण्यात आलेल्या रिपोर्टनुसार 94 जणांचे अहवाल पॉझिटिव्ह आले आहेत. त्यामुळे जिल्ह्यातील कोरोनाग्रस्तांची संख्या ही 1 हजार 695 झाली आहे. तर उपचार घेऊन बरे झालेल्या नागरिकांनी 1 हजारांचा आकडा ओलांडला असल्याची माहिती जिल्हा शल्यचिकित्सक डॉ. आमोद गडीकर यांनी दिली.
पॉझिटिव्ह अहवाल प्राप्त झालेले रुग्ण हे जावळी, खंडाळा, कोरेगाव, कराड, पाटण, माण, वाई, सातारा व फलटण या तालुक्यातील आहेत. तर दुसऱ्या बाजूला जिल्ह्यात विविध रुग्णालये आणि कोरोना केअर सेंटरमध्ये उपचार घेत असलेल्या 60 नागरिकांना 10 दिवसांनंतर घरी सोडण्यात आले. खंडाळा, सातारा, पाटण, कराड, खटाव व वाई तालुक्यातील हे सगळे आहेत.
490 जणांच्या घशातील नमुने तपासणीला
क्रांतीसिंह नाना पाटील सर्वसाधारण रुग्णालय, सातारा येथील 21, कृष्णा मेडिकल कॉलेज येथील 44, स्व. वेणूताई चव्हाण उपजिल्हा रुग्णालय कराड येथील 67, ग्रामीण रुग्णालय फलटण येथील 18, कोरेगाव येथील 51, वाई येथील 64, शिरवळ येथील 91, रायगाव येथील 54, पानमळेवाउी येथील 24, मायणी येथील 37, महाबळेश्वरयेथील 5, खावली येथील 14 असे एकूण 490 जणांच्या स्वॅबचे नमुने तपासणीसाठी पाठवण्यात आले असल्याचेही डॉ. गडीकर यांनी सांगितले.
जिल्ह्यातील परिस्थिती
- घेतलेले एकूण नमुने - 17623
- एकूण बाधित - 1695
- घरी सोडण्यात आलेले - 1010
- कोरोनामुळे मृत्यु - 65
- आज उपचार घेत असलेले रुग्ण - 620
