कराड (सातारा) - रस्त्यात सापडलेली मौल्यवान ऐवजाची पर्स कराडच्या नगराध्यक्षा रोहिणी शिंदे यांनी ताब्यात घेऊन, संबंधित महिलेला परत केली आहे. नगराध्यक्षांच्या या प्रामाणिकपणाचे कराडमध्ये कौतुक होत आहे. या पर्समध्ये सुमारे दोन लाखांचा ऐवज होता.
गुरुवारी सायंकाळी कराड नगरपालिकेच्या बजेटची विशेष सभा होती. सभा संपल्यानंतर नगराध्यक्षा आपल्या शासकीय वाहनातून शहरात सुरू असलेल्या कामांची पाहाणी करत होत्या. कामांची पाहणी करून झाल्यानंतर घरी जात असताना, बुधवार पेठेतील आंबेडकर पुतळ्याच्या परिसरात त्यांना रस्त्यावर पर्स पडल्याचे दिसले. त्याचवेळी एक दाम्पत्य ती पर्स उचलताना त्यांना दिसले, परंतु नगराध्यक्षांनी त्यांना ती पर्स पोलिसांच्या ताब्यात देणार असल्याचे सांगताच ते दाम्पत्य घटनास्थळावरून निघून गेले. त्यानंतर नगराध्यक्षांनी आपल्या स्वीय सहाय्यकाला ती पर्स ताब्यात घ्यायला लावली.
पर्समध्ये लाखोंचा ऐवज
काही वेळानंतर त्या पर्समधील मोबाईलवर पर्स हरवलेलेल्या महिलेचाच फोन आला. नगराध्यक्षांनी त्यांना पर्स सुरक्षीत असून, नगरपालिकेत येण्यास सांगितले. ती महिला तातडीने नगरपालिकेत आली. नगराध्यक्षांनी पर्समधील ऐवज तपासून घेण्यास सांगितले. पर्समध्ये चेन, अंगठी, तीन रुद्राक्ष आणि रोकड असा दोन लाखांचा ऐवज होता. सर्व ऐवज बरोबर असल्याची खात्री करून ती पर्स नगराध्यक्षांनी त्या महिलेकडे सुपूर्द केली. पर्स मिळताच त्या महिलेला रडू कोसळले, त्यांनी पर्स परत केल्याबद्दल नगराध्यक्ष रोहिणी शिंदे यांचे आभार मानले.
