Ajit Pawar Vs Shambhuraj Desai : आपली तब्येत काय? आपण बोलतो किती? अजित पवारांचा शंभूराज देसाईंना टोला

सरकारने भ्रष्ट्राचाराची परिसीमा गाठली आहे. हवे तसे काम करून घेण्यासाठी शासकीय अधिकाऱ्यांवर दबाव आणण्याचे उद्योग सुरू आहेत. अशा बिनकामाच्या सत्ताधाऱ्यांचे येत्या निवडणुकीत विसर्जन करण्याचे आवाहन विरोधी पक्ष नेते अजित पवार यांनी पाटण तालुक्यातील राष्ट्रवादी काँग्रेस कार्यकर्त्यांच्या मेळाव्यात केले. यावेळी त्यांनी मंत्री शंभूराज देसाई यांच्यावर टीका केली.

सातारा: राष्ट्रवादीचे युवा नेते सत्यजितसिंह पाटणकर यांनी आयोजित केलेल्या कार्यकर्त्यांच्या मेळाव्यात बोलताना अजित पवार यांनी शिंदे गटाचे मंत्री शंभूराज देसाई यांचा खरपूस समाचार घेतला. कराड-चिपळूण रस्त्याची अवस्था काय आहे? पाटण तालुक्याचे प्रतिनिधी काय करतात? वीज वितरणच्या ठेकेदारांना दमदाटी केली जाते. टेंडर रद्द केली जातात. अधिकाऱ्यांनी दबावात काम करू नये, असे अजित पवारांनी अधिकाऱ्यांना सल्ला दिला.


कर्नाटक विधानसभा निवडणुकीतील उदाहरण देताना अजित पवार म्हणाले की, काँग्रेस पक्ष सोडून भाजपमध्ये गेलेल्यांना जनतेने नाकारले आहे. शिवसेनेत मोठे होऊन मंत्री झालेल्यांनी शिवसेनेशी गद्दारी करत बाळासाहेबांच्या मुलाला सत्तेबाहेर काढले. अशा गद्दारांची विश्वासार्हता काय ? भविष्यात ते जनतेशी तरी विश्वासू राहणार का? असा टोलाही अजित पवार यांनी शंभूराज देसाईंना लगावला.

शड्डू ठोकून विकास होत नाही- पाटण बाजार समितीची सत्ता मिळाल्यानंतर विजयी मिरवणुकीत शड्डू ठोकणाऱ्या शंभूराज देसाईंना अजितदादांनी टोला लगावला. आपली तब्येत काय? आपण बोलतो किती? शड्डू ठोकून पाटण मतदार संघाचे प्रश्न सुटणार आहेत का? समस्या सुटणार आहेत का?, असे सवाल माजी उपमुख्यमंत्री पवार यांनी केले. पाटण तालुक्यात सायरन वाजला की लोक म्हणतात, पन्नास खोके, एकदम ओके, असा टोला अजित पवार यांनी शंभूराज देसाईंना लगावला. महाविकास आघाडीत जो मतदार संघात ज्याच्या वाट्याला येईल त्या पक्षाच्या उमेदवाराला निवडून देण्याचे आवाहन अजित पवार यांनी केले.

राष्ट्रवादीकडून शंभूराज देसाईंना घेरण्याची तयारी सुरू- एकनाथ शिंदे यांच्याबरोबर बंडखोरीत सहभागी झाल्यानंतर शंभूराज देसाई हे शिंदे फडणवीस सरकारमध्ये पुन्हा मंत्री झाले. ते २००४ ला पहिल्यांदा आमदार झाले. त्यानंतर २००९ ला विक्रमसिंह पाटणकरांनी शंभुराजेंचा पराभव केला. २०१४ आणि २०१९ ला विक्रमसिंह पाटणकर यांचे सुपुत्र सत्यजितसिंह पाटणकर यांचा शंभूराज देसाईंनी पराभव केल्यानंतर राष्ट्रवादीला धक्का बसला. राष्ट्रवादीला पुन्हा पाटण मतदार संघावर सत्ता मिळवायची आहे. त्यासाठी शंभूराज देसाईंना घेरण्याची व्यूहरचना राष्ट्रवादीने आखली आहे.

हेही वाचा-