रत्नागिरी - रत्नागिरी जिल्ह्यातील दापोली तालुक्यातील सालदूरे मुरुड समुद्रकिनारी बुधवारी सकाळी ब्लू व्हेल जातीचा मासा मृतावस्थेत आढळून आला. दहा ते बारा दिवसांपूर्वी समुद्रात त्याचा मृत्यू होऊन तो लाटांमुळे वाहत समुद्रकिनारी आला असावा, असा अंदाज आहे.
मृत मासा समुद्रकिनारी आला असल्याचे समजताच हा ब्लू व्हेल मासा पाहण्यासाठी नागरिकांनी समुद्रकिनारी मोठ्या प्रमाणात गर्दी केली होती. साधारण ५७ फूट लांबीचा हा ब्लू व्हेल मासा असून याचा सुमारे पंधरा दिवसांपूर्वी समुद्रात मृत्यू झाला असावा, अशी माहिती प्राणी तज्ज्ञ अभिनय केळस्कर यांनी दिली. मोठ्या जहाजाला आपटून किंवा प्रदूषणामुळे अथवा आपल्या कुटुंबापासून दूर राहिल्यामुळे, अशा माशांचा मृत्यू ओढवतो, असेही त्यांनी सांगितले.
मासा कुजलेल्या अवस्थेत असल्याने किनाऱ्यावर दुर्गंधी पसरली होती. त्यामुळे लोकांच्या आरोग्याचा प्रश्न निर्माण होऊ शकतो. याचे गांभीर्य लक्षात घेऊन दापोली वनविभागाने समुद्रकिनाऱ्यावर वाळूत मोठा खड्डा खोदून या माशाची विल्हेवाट लावली आहे.
काही वर्षांपूर्वी कर्दे गावाच्या समुद्रकिनारी देखील असाच महाकाय साधारण सुमारे ५०० किलो वजनाचा व्हेल मासा मृतावस्थेत आढळून आला होता.
