रायगड : पेण बलात्कार आणि हत्या प्रकरणाची सुनावणी अलिबाग पोस्को न्यायालयात सुरू झाली आहे. या खटल्यासाठी विशेष सरकारी वकील उज्ज्वल निकम आज (सोमवार) अलिबाग पोस्को न्यायालयात हजर राहिले. त्यांनी आज आरोपींविरोधातील आरोप पत्रात गुन्ह्याची कलमे दाखल केली. विशेष पोस्को न्यायाधीश शेख यांच्या न्यायालयात हा खटला सुरू आहे. पुढील सुनावणी 30 मार्च रोजी होणार आहे.
पेण शहरातील बलात्कार-हत्या प्रकरण -
पेण शहरातील मळेघर आदिवासी वाडीत अडीच वर्षीय अल्पवयीन मुलीवर बलात्कार करून तिची हत्या केल्याची घटना 29 डिसेंबर रोजी रात्रीच्या सुमारास घडली होती. या घटनेने जिल्ह्यात खळबळ माजली होती. पेण पोलिसांनी काही तासांत आरोपीला अटक केली होती. त्यानंतर या प्रकरणात आरोपीला कडक शिक्षा व्हावी आणि हा खटला जलदगती न्यायालयात सुरू करा, अशी मागणी करण्यात आली होती. त्यानुसार पेण पोलिसांनी या गुन्ह्याच्या तपास करून अलिबाग न्यायालयात आरोपी विरोधात दोषारोप पत्र दाखल केले.
हेही वाचा - एटीएस प्रमुख जयजीत सिंग यांनी गृहमंत्री अनिल देशमुख यांची घेतली भेट
सरकारी वकील उज्ज्वल निकम आज हजर -
या बलात्कार व हत्या प्रकरणाच्या खटल्यात उज्ज्वल निकम यांची शासनाने विशेष सरकारी वकील म्हणून नेमणूक केली आहे. त्यानुसार, आज उज्ज्वल निकम हे अलिबाग पोस्को न्यायालयात हजर राहिले. यावेळी त्यांनी आरोपींवर गुन्ह्यातील कलम लावून आरोपपत्र दाखल केले. या प्रकरणाची पुढील सुनावणी 30 मार्चला पोस्को न्यायालयात होणार आहे.
रोहा हत्या प्रकरणात 22 व 23 एप्रिल रोजी सुनावणी -
रोहा तांबडी येथील अल्पवयीन मुलीचा खून केल्याची घटना 4 महिन्यांपूर्वी घडली होती. या खटल्यातही विशेष सरकारी वकील म्हणून उज्ज्वल निकम काम पाहत आहेत. या प्रकरणात रोहा पोलिसांनी माणगाव न्यायालयात दोषारोप पत्र दाखल केले आहे. या प्रकरणाची पुढील सुनावणी ही 22 व 23 एप्रिल रोजी माणगाव न्यायालयात होणार आहे, याची माहिती सरकारी वकील उज्ज्वल निकम यांनी दिली.
हेही वाचा - सेटलमेंट, बडतर्फी आणि ५० लाखांची मागणी, परमबिरसिंगांवर पोलिस निरिक्षकाचे गंभीर आरोप
