पुणे : पुणे शहरात गेल्या काही दिवसांपासून वाढत असलेले गुन्हे तसेच वाढत असलेल्या गुन्ह्यांचे स्वरूप पाहता शहरात गुन्हा करताना धाक राहिला आहे की नाही असा प्रश्न निर्माण होत आहे. पुण्यातील उरुळी कांचन मध्ये एक धक्कादायक प्रकार समोर आला आहे. भाच्याने मामाच्या मुली बरोबर पळून जाऊन लग्न केले म्हणून मुलाच्या दोन बहिणींना उघडे करून मारहाण करण्यात आली. या प्रकरणी सहा जणांच्या विरोधात लोणीकाळभोर पोलिस ठाण्यात गुन्हा दाखल करण्यात आला आहे. या घटनेमुळे सर्वत्र संताप व्यक्त केला जात आहे.
काय आहे प्रकरण : ३० वर्षीय पीडित तरुणीने लोणी काळभोर पोलिस ठाण्यात संबंधित घटनेत फिर्याद दिली आहे. ही घटना २६ ते २९ जानेवारी रोजी घडली आहे. फिर्यादी महिला आणि आरोपी हे नातेवाईक आहेत. आरोपी यांच्या नात्यातील युवतीस फिर्यादी तरुणीच्या भावाने पळवून नेल्याचा संशय आरोपींना होता. त्यातूनच आरोपींनी फिर्यादी तरुणी आणि तिच्या बहिणीचे अपहरण केले.
तरूणींना केले विवस्त्र : पलायन केलेल्या युवतीबद्दल विचारले असता दोघींनी त्याबाबत काही सांगितले नाही. म्हणून त्यांना मारहाण करण्यात आली आणि एका खोलीत त्यांना दोन दिवस डांबून ठेवले. त्यानंतर तरुणीस विवस्त्र करून तिचे मोबाइल कॅमेऱ्याद्वारे चित्रीकरण केले. चित्रीकरण त्यांनी समाजमाध्यमात प्रसारित केल्याचे फिर्यादीत म्हटले आहे.
रूणीला बेदम मारहाण : प्रेमप्रकरणातून युवतीला पळवून नेल्याने तरुणाच्या बहिणीचे अपहरण करून तिला बेदम मारहाण करण्यात आल्याची घटना घडली. अपहरण केल्यानंतर २४ वर्षीय तरूणीला विवस्त्र करून खोलीत डांबून ठेवून मोबाइल कॅमेऱ्याद्वारे चित्रीकरण करण्यात आले. आरोपींनी समाजमाध्यमावर ध्वनिचित्रफीत प्रसारित केल्याचे समोर आले आहे.
