पुणे - अभिनेते धर्मेंद्र, अभिनेत्री हेमा मालिनी, अभिनेता खासदार सनी देओल, अभिनेता बॉबी देओल, अभिनेत्री ईषा देओल, उषा अजितसिंग देओल, अहाना देओल, प्रकाश देओल, विजयसिंग देओल, अजितसिंग देओल यांच्यासह एकूण नऊ जणांविरोधात राज्यसभा खासदार संजय काकडे यांनी पुणे न्यायालयात धाव घेतली आहे. लोणावळा येथील 185 एकर जागेच्या संर्दभात धर्मेंद्र यांचे कुटुंबीय आणि काकडे यांच्यात व्यवहार झाला होता.
दोघे मिळून सदर जागेवर जे. डब्ल्यू. मेरियट रिसोर्ट व बंगल्याची स्कीम करणार होते. ठरलेल्या व्यवहाराप्रमाणे धर्मेंद्र यांच्या कुटुंबीयांना पैसे देऊनही जमिनीची नोंदणी करण्यास ते टाळाटाळ करत असल्याचा आरोप खासदार काकडे यांनी केला आहे.
यावेळी काकडे म्हणाले, लोणावळामधील पुणे-मुंबई द्रुतगती महामार्गाजवळील जागेबाबत 31 मे 2018 रोजी खासदार संजय काकडे आणि अभिनेता धर्मेंद्र व अभिनेत्री हेमा मालिनी यांच्या कुटुंबीयासोबत जागेचा व्यवहार निश्चित झाला. सदर ठिकाणी धर्मेंद्र यांचे कुटुंबीयाच्या मालकीची एकूण 215 एकर जागा आहे. त्यापैकी 25 एकर जागेत धर्मेंद्र यांचा बंगला आणि आजू-बाजूचा परिसर आहे. उर्वरित 185 एकर जागेपैकी 100 एकर जागेवर जे.डब्ल्यू मेरियट हे अलिशान पंचतारांकित रिसोर्ट उभारले जाण्याचे नियोजीत आहे. याकरिता काकडे आणि धर्मेंद्र यांचे कुटुंबीय निम्मा-निम्मा खर्च करण्याचे ठरले आहे. त्यापैकी 30 टक्के उत्पन्न धर्मेंद्र कुटुंबीय तर 70 टक्के उत्पन्न काकडे घेणार असे ठरविण्यात आले.
हेही वाचा - 'आमदार थोपटेंसाठी भाजपची दारे उघडी'
तर, 85 एकर जागेवर संजय काकडे हे बंगल्यांची स्कीम बांधून त्याची विक्री करणार असून त्यातील नफ्याचे उत्पन्न दोघे मिळून निम्मे-निम्मे वाटून घेणार, असे निश्चित झाले होते. सदर व्यवहार दोघांमध्ये ठरल्यानंतर काकडे यांनी डिपॉझीट रक्कम धर्मेंद्र कुटुंबीयास दिली. त्यानंतर तातडीने जमिनीची नोंदणी करून कामाला सुरुवात करणे, अपेक्षित होते. मात्र, धर्मेंद्र व त्यांच्या मुलांनी चित्रपटाचे काम होऊ दे, निवडणूक होऊ दे, असे सांगत 18 महिने होऊनही नोंदणी करण्यास टाळाटाळ केली. त्यामुळे काकडे यांनी याबाबत धर्मेंद्र यांच्याकडे तसेच त्यांच्या वकिलासोबत 20 वेळा बैठका घेऊनही पुढे काम जात नव्हते.
हेही वाचा - कोरेगाव भीमा शौर्य दिनानिमित्त विजयस्तंभाला अजित पवारांनी दिली मानवंदना
काकडे यांनी सांगितले की, माझ्याकडून व्यवहार ठरल्यानंतर पैसे घेऊनही पूर्ण जागा देण्यास नकार देत 85 एकर जागा घ्या, आम्ही हॉटेलचे काम पाहतो, असे सांगत टाळाटाळ केली गेली. माझ्यावर काही राजकीय नेत्यांच्या माध्यमातून दबाव टाकण्याचाही प्रयत्न केला गेला. परंतु, सदर व्यवहाराची कागदपत्रे पाहिल्यानंतर वरिष्ठ राजकीय नेत्यांनी माझी बाजू योग्य असल्याचे सांगितले. धर्मेंद्र कुटुंबीयांना दुसरी एखादी मोठी पार्टी व्यवहाराकरिता मिळाली असावी, त्यामुळे माझ्यासोबत व्यवहार करण्यास ते चलबिचल करत आहेत, असे काकडे यांनी सांगितले.
याप्रकरणाची पुढील सुनावणी आर. व्ही. रोटे न्यायालयात 10 जानेवारीला होणार असून संबंधित प्रकरणात धर्मेंद्र यांच्या कुटुंबीयांना हजर राहण्यास न्यायालयाने सांगितले आहे.
