बारामती (पुणे) - दिवाळीनिमित्त झारगडवाडी येथीत तरुणांनी राजगड किल्ल्याची भव्य अशी 30 फूट लांबीची प्रतिकृती साकारली आहे. हा किल्ला पाहण्यासाठी परिसरातील नागरिक गर्दी करत आहेत.
दिवाळीनिमित्त सर्वांनाच किल्ले बनवण्याचे आकर्षण असते, त्याचप्रमाणे बारामती तालुक्यातील झारगडवाडी येथील दुर्गप्रेमी असणाऱ्या काही तरुणांनी राजगड किल्ल्याची हुबेहूब प्रतिकृती उभारली आहे. प्रत्यक्ष किल्ल्यामध्ये असणारे अनेक बारकावे त्यामध्ये पद्मावती तलाव, चोर दरवाजा, रामेश्वर मंदिर, पद्मावती माची, उद्धस्त वास्तू, दीपमाळ, तळघर कचेरी, दारुगोळा कोठार, धान्य कोठार, सदर तोफ यासारख्या गोष्टी हुबेहूब साकारण्यात आल्या आहेत. हा किल्ला तीस फूट लांब, दहा फूट रुंद व पाच फूट उंचीचा तयार करण्यात आला आहे. या किल्ल्यावरून व्यक्तींना सहज चालता येईल अशापद्धतीने या किल्ल्याची रचना करण्यात आली आहे.
प्रतीक बळी, वैष्णव बळी, गणेश बोरकर, योगीराज खरात, सौरभ सूळ, मोहित सोनवणे, तात्या शिंदे, प्रणव बोरकर, शुभम खरात या तरुणांनी या किल्ल्याची निर्मीती केली आहे. हा किल्ला तयार करण्यासाठी तब्बल 15 दिवसांचा कालावधी लागला. बारामती ट्रेकर्स क्लबचे सदस्य व दुर्गप्रेमी सचिन वाघ या किल्ल्याच्या प्रतिकृतीबाबत बोलताना म्हणाले की, आम्ही अनेकवेळा राजगड किल्ल्याची भ्रमंती केली आहे, येथील तरुणांनी केलेला किल्ला पाहिल्यानंतर साक्षात राजगड किल्ल्यावर आल्याची अनुभूती होत आहे, कारण किल्ल्यावर असणारे सर्व बारकावे याठिकाणी जसेच्या तसे पाहायला मिळत आहेत.
हेही वाचा- दौंड पोलिसांची अवैध वाळू प्रकरणी मोठी कारवाई
हेही वाचा- कोरोना इफेक्ट : पुण्यात फटाका विक्रीत 50 टक्क्यांची घट
