परभणी - पावसाळा सुरू होऊन दोन महिन्याचा कालावधी लोटला आहे. मात्र, पुरेशा पावसाअभावी जिल्ह्यातील एकाही प्रकल्पात थेंबभर पाण्याचा साठा होऊ शकलेला नाही. अशा परिस्थितीत तहानलेल्या जिल्ह्यातील नागरिकांसाठी खुशखबर आहे. उत्तर महाराष्ट्रातील धरणांमधून सोडलेले पाणी जायकवाडीत आले आणि ते पुढे पाथरी तालुक्यातील ढालेगाव बंधाऱ्यात झेपावले आहे. यामुळे अनेक गावांच्या पिण्याच्या पाण्याची चिंता काही अंशी का होईना मिटली आहे.
पाथरी शहर आणि जवळपासच्या अनेक गावांना पाणी पुरवठा करणाऱ्या ढालेगाव बंधाऱ्यात जायकवाडीच्या पैठण डाव्या कालव्याच्या (काट नियमक १२२.३४० किमीच्या) सांडव्यातून शुक्रवारी पिण्यासाठी प्रती सेकंद दीडशे ते दोनशे क्यूसेसने पाणी सोडल्याची माहिती, जायकवाडी उपविभाग क्रमांक ६ चे उपअभियंता खारकर यांनी दिली. दरम्यान, पाथरी शहरात मे महिन्यापासून तीव्र पाणी टंचाई आहे. तीन दिवसाला मिळणारे पाणी आता बारा-पंधरा दिवसाला सुटत आहे. पावसाळा अर्धा अधिक संपूनही पाथरी तालुक्यातील ढालेगाव आणि मुदगल बंधारे कोरडे आहेत. त्यामुळे गोदाकाठावरील गावांत तीव्र पाणी टंचाई निर्माण झाली आहे.
पाथरी पालिकेच्या वतीने यापूर्वी बंधाऱयात पाणी सोडण्याची मागणी केली होती. मात्र, जायकवाडी धरणात पाणी नसल्याने ते मिळाले नाही. तर मागील पंधरा दिवसात नाशिक, नगर जिल्ह्यात जोरदार पर्जन्यवृष्टी झाली. यावर्षी जवळपास चौदा दिवसात जोत्याखाली असलेले जायकवाडी धरण ९२ टक्के भरल्याने डाव्या कालव्यात प्रतिसेकंद एक हजार चारशे क्यूसेसने पाणी सोडले आहे. वरखेड येथून सुरुवातीला १५० क्यूसेसने सकाळी अकरा वाजता सांडव्याव्दारे नाल्यात सोडले असून या नाल्याची स्थिती पाहून विसर्ग वाढवणार असल्याचे उपअभियंता खारकर यांनी सांगितले.
याशिवाय मानवत शहराला पाणी पुरवठा करण्यासाठी १५ ऑगष्टपासून झरी तलावात पाणी सोडले असल्याची माहितीदेखील खारकर यांनी दिली. दरम्यान, अनेक दिवसांपासून ढालेगाव बंधाऱ्यात पाणी सोडा, अशी मागणी करणाऱया ग्रामस्थांना यामुळे दिलासा मिळाला. आता यानंतर बी-५९ क्रमांकाच्या चारीव्दारे फुलारवाडी येथून मुदगल बंधाऱ्यासाठी पाणी सोडावे, अशी मागणी लिंबा, विटा आदी गावच्या नागरिकांनी केली आहे.
