पालघर - भारतीय जनता पक्षाला घाणेरडे राजकारण करण्याशिवाय दुसरा पर्यायच राहिलेला नाही. त्यांनी केलेल्या या राजकारणाचा परिणाम बिहार निवडणुकीच्या निकालात दिसेलच. निकालानंतर भाजपाचे बिहारमधील राजकारणही संपेल, असा खोचक टोला राज्याचे पाणीपुरवठा मंत्री गुलाबराव पाटील यांनी भाजपाला लगावला आहे. पालघरमध्ये आज जिल्ह्यातील पाणी प्रश्नाबाबत आढावा बैठक घेण्यात आली.
प्रत्येक गाव व पाड्यांपर्यंत पोहोचवणार पाणी -
पालघर जिल्ह्यात मुबलक प्रमाणात पाऊस होतो. मात्र, तरीही अनेक गावे आणि पाडे पाण्यापासून वंचित आहेत. त्यांना पाणी टंचाईचा सामना करावा लागतो. या नागरिकांच्या सोयीसाठी प्रशासन काम करत आहे. आतापर्यंत पाणी पुरवठा विभागाचे 20 टक्के काम पूर्ण झाले आहे. पुढील सहा महिन्यात जास्तीत जास्त कामकरून सर्वच नागरिकांपर्यंत पाणी पोहोचवण्यासाठी सर्वतोपरी प्रयत्न करणार असल्याचे आश्वासन गुलाबराव पाटील यांनी दिले.
'जीवन जल मिशन' योजने अंतर्गत 2024 पर्यंत प्रत्येक घरात पाणी -
पाणीपुरवठ्या संबंधित जीवन जल मिशन (जेजेएम) ही योजना सुरू करण्यात आली आहे. यात 50 टक्के खर्च केंद्र सरकारचा व 50 टक्के खर्च राज्य सरकारचा आहे. या योजनेअंतर्गत 2024 पर्यंत प्रत्येक माणसाच्या घरी नळ आणि जल देण्याचा शासनाचा मानस आहे.
दिवाळी अगोदर नुकसानग्रस्त शेतकऱ्यांना मिळणार मदत -
अतिवृष्टीमुळे राज्यातील शेतकर्‍यांचे मोठ्या प्रमाणावर नुकसान झाले आहे. शेतकऱ्यांना मदत देण्याची सर्व प्रक्रिया पूर्ण झाली आहे. लवकरच दिवाळी अगोदर शेतकऱ्यांच्या खात्यात ही मदत जमा केली, जाईल असे आश्वासन गुलाबराव पाटील यांनी दिले आहे.
