पालघर - वसई तालुक्यातील काँग्रेसला आणखी धक्का बसला आहे. काँग्रेसचे राज्य सचिव विजय पाटील यांनी आपल्या शेकडो कार्यकर्त्यांसह गुरुवारी 'मातोश्री'वर काँग्रेस पक्षाचा राजीनामा देत शिवसेनेत जाहीर प्रवेश केला. बहुजन विकास आघाडीचे सर्वेसर्वा हितेंद्र ठाकूर यांना शह देण्यासाठी शिवसेनेकडून पाटील हे वसई विधानसभा मतदारसंघातून निवडणूक लढवण्याची दाट शक्यता वर्तवण्यात येत आहे.
हेही वाचा - प्रदीप शर्मा शिवसेनेत, पोलीस खात्यात चकमक दाखवल्यानंतर राजकारणात चमकणार?
पाटील हे वसईतील एक उद्योजक असून स्वच्छ प्रतिमेचा व शांत, संयमी असा राजकीय चेहरा आहेत. ते वसईतील प्रभावी राजकीय नेते असून आग्री, वाढवळ, ख्रिश्चन या समुदायांचा त्यांना चांगला जनाधार आहे. अनेक महिन्यांपासून ते पालघर व ठाणे जिल्ह्यातील शिवसेना नेत्यांच्या संपर्कात होते, त्यातच ते वसई विधानसभा मतदारसंघातून आमदारकी लढवण्यास बऱ्यापैकी इच्छुक असल्याने पाटील यांनी अखेर शिवसेना पक्षात प्रवेश करत सर्वांना धक्का दिला.
