उस्मानाबाद - राष्ट्रवादीचे संस्थापक सदस्य डॉ. पद्मसिंह पाटील यांचे चिरंजीव राणा जगजितसिंह पाटील हे भाजपप्रवेश करणार असल्याची चर्चा सध्या जोर धरत आहे. जगजितसिंह पाटील यांच्या प्रयत्नातून उस्मानाबाद, लोहारा या दोन तालुक्यातील शेतकऱ्यांना २०१७ या वर्षीचा पीक विमा मिळाला. तेव्हा पाटील यांचे आभार व्यक्त करण्यासाठी शहरात होर्डिंग लावण्यात आले आहेत. मात्र या होर्डिंगवर शरद पवार आणि राष्ट्रवादीच्या घड्याळाचे चिन्ह नसल्याने राणा पाटील हे पक्ष बदलणार का या चर्चेला उधाण आले.
पक्षप्रवेशाला अधिकृत दुजोरा नाही
राणा जगजितसिंह पाटील यांचे राष्ट्रवादीत चांगले स्थान आहे. भविष्यात राष्ट्रवादीची सत्ता आली तर मंत्रिपदासाठी मराठवाड्यातून राणा जगजितसिंह पाटील यांचे नाव अग्रेसर असेल. असे असले तरीही पाटील यांच्याकडून भाजपप्रवेश करणार असल्याच्या चर्चा बाबतीत अद्याप कुठलाही खुलासा करण्यात आलेला नाही. त्याचबरोबर भाजपकडूनही अद्याप पाटील यांच्या पक्षप्रवेशाबद्दल स्पष्टीकरण देण्यात आले नाही.
न्यायालयीन प्रकरणांपासून सुटकेसाठी पक्षप्रवेश ?
देशभरात गुन्हे दाखल असलेल्या पण चांगले राजकीय वजन असलेल्या व्यक्तिमत्वाचा भाजपमध्ये प्रवेश होतो आहे. गुन्हेगारी प्रवृत्तीच्या नेत्याने जर भाजपप्रवेश केला तर, भाजपमध्ये वाल्याचा वाल्मिकी होतो असे स्पष्टीकरण भाजपकडून देण्यात येते. या अनुषंगाने डॉ.पद्मसिंह पाटील यांच्या वर शिवसेनेचे खासदार ओमप्रकाशराजे निंबाळकर यांचे वडील पवनराजे निंबाळकर यांची हत्या केल्याचा आरोप आहे. हे प्रकरण सध्या न्यायालयात सुरू आहे. त्याचबरोबर पाटील घराण्यावर जिल्हा अतिमागास ठेवल्याचा आरोपही केला जातो. यामुळेच न्यायालयीन प्रकरणांपासून सुटकेसाठी राणा जगजितसिंह पाटील हे भाजपप्रवेश करत आहेत का, असा प्रश्न उपस्थित केला जातो आहे
भाजप पाटील यांना स्वीकारेल याची शंका
भाजप आणि शिवसेनेचा जिल्ह्यातील एकमेव विरोधक म्हणून पाटील कुटुंबाकडे पाहिले जाते. भाजपकडे वाढलेला कल पाहता जिल्ह्यात भाजप मजबूत होत आहे. भाजपमध्ये विधानसभेसाठी इच्छुक असणारे भरपूर नेतेमंडळी आहे. त्याचबरोबर जिल्ह्यातील इतर राष्ट्रवादीच्या नेत्यांनी भाजपाची वाट धरली आहे. या सर्वांनीच पाटील कुटुंबावर घराणेशाहीचा आरोप करत राष्ट्रवादीला सोडचिठ्ठी देत भाजप प्रवेश केला. यामुळे भाजपमध्ये विधानसभेसाठीच्या इच्छुक उमेदवारांची गर्दी पाहता आणि घराणेशाहीचा आरोप करून राष्ट्रवादीला सोडलेल्या लोकांमुळे पाटील यांना भाजपात प्रवेश मिळेल की नाही, याबाबत शंका आहे.
शिवसेनेची कोंडी होईल
लोकसभेच्या निवडणुकी वेळी भाजपने शिवसेनेच्या जागेवर लोकसभा निवडणूक लढवण्यासाठी दावा केला होता. मात्र, शिवसेनेने ही जागा भाजपला दिली नाही. त्याचबरोबर राज्यात भाजप आणि शिवसेनेमध्ये वारंवार होणारी धुसफूस याचा वचपा काढण्यासाठी आणि शिवसेनेला शह देण्यासाठी राणा जगजितसिंह पाटील यांना भाजपमध्ये प्रवेश देण्यात येतोय का, असा प्रश्नही उपस्थित केला जातो आहे.
जगजितसिंह पाटील यांच्या पक्षप्रवेशाला अधिकृत दुजोरा नसल्याने राष्ट्रवादीकडून लावण्यात आलेले जुनी होर्डिंग काढून त्याजागी शरद पवार व राष्ट्रवादीच्या चिन्हाचा फोटो असलेले होर्डिंग नव्याने लावण्यात आले आहेत.
