नाशिक - गत वर्षीच्या तुलनेत या वर्षी डेंग्यूच्या रुग्णांची संख्या वाढत असून ऑक्टोबर महिन्यात तब्बल १७८ जणांना डेंग्यूची लागण झाली आहे. आतापर्यंत ५४९ डेंग्यू संशयीत रूग्ण आढळले असून तीन संशयीत रुग्णांचा मृत्यू झाला आहे. डेंग्यूच्या वाढत्या प्रादुर्भावामुळे शहरातील नागरिकांमध्ये भीतीचे वातावरण आहे.
सप्टेंबर महिन्याच्या पंधरवड्यापर्यंत शहरात १०५ तर ऑगस्ट महिन्यात १२० डेंग्यू संशयीत रुग्ण अढळून आले. हीच संख्या ऑक्टोबर महिन्यात ७०२ एवढी होती. १७८ जणांना डेंग्यू झाल्याचे निष्पन्न झाले. महानगर पालिकेच्या आरोग्य विभागाकडून दिलेल्या माहितीनुसार शहराच्या विविध सरकारी, खाजगी रुग्णालयांमध्ये उपचार घेणाऱ्या रुग्णांची संख्या अधिक आहे. पावसाळा लांबल्यामुळे पाणी साचून डासांची मोठ्या प्रमाणात निर्मिती होत आहे. महानगरपालिकेच्या वतीने डास निर्मुलनासाठी फवारणी आणि साफसफाई कायम सुरू असल्याचा दावा असला, तरी या कामात अनियमीतता होत असल्याच्या अनेक तक्रारी आहेत.
जानेवारी महिन्यापासून ते ३१ ऑक्टोबर या दहा महिन्यात तब्बल १९४७ डेंग्यू सदृश्य रुग्णांची तपासणी करण्यात आली आहे. त्यातील ५४९ जणांना डेंग्यू झाल्याचे निष्पन्न झाले आहे. तर, या १० महिन्यात तीन जणांचा डेंग्यूने बळी गेल्याचे समजले आहे. थंडी, ताप, उलटी, डोक दुखणे, हे लक्षण दिसून आल्यास नागरिकांनी वैद्यकीय सल्ला घ्यावा, असे आवाहन जिल्हा शासकीय रुग्णालयाचे सिव्हिल सर्जन सुरेश जगदाळे यांनी केले आहे.
हेही वाचा- आदित्य ठाकरेंचा नाशिक दौरा; ओला दुष्काळ जाहीर करण्याची शेतकऱ्यांची मागणी
