नंदुरबार - मजुरांना घेऊन जाणाऱ्या रिक्षासमोर सायकल आल्याने रिक्षा उलटून अपघात झाला. या अपघातात एका महिलेचा जागीच मृत्यू झाला. तर पाच जण जखमी झाले आहे. ही घटना नंदुरबार तालुक्यातील पिंपळोद गावाजवळ घडली.
असा झाला अपघात
अमरसिंग जेमाभाई वळवी (रा. गामडी, ता. निझर, गुजरात) हा रिक्षाचालक रायगड येथुन मजुर शेतात मिरची तोडण्याच्या कामासाठी अ‍ॅपेरिक्षाने (क्र.जी.जे.26 टी.4037) धानोरामार्गे नंदुरबार तालुक्यातील पाचोराबारी येथे घेवुन जात होता. धानोरा ते नंदुरबार रस्त्यादरम्यान पिंपळोद गावाच्या शिवारात वळण रस्त्यावर पिंपळोदकडुन सायकलस्वार अ‍ॅपेरिक्षासमोर आला. त्यामुळे चालकाचा ताबा सुटल्याने अॅपेरिक्षा उलटली.
महिला जागीच ठार
अपघातात अ‍ॅपेरिक्षातील सुनिता चंद्रसिंग वसावा (वय 30 रा.रायगड ता.निझर) ही मजुर महिला जागीच ठार झाली. तसेच दीपिका वासु गावीत, चंद्राबेन महेंद्र वसावा, कल्पना वासु गावीत, राहुल कांतीलाल नाईक, विपेश वसंत वळवी (सर्व रा.रायगड ता.निझर) हे पाच मजुर जखमी झाले. अपघातानंतर परिसरातील नागरिकांनी जखमींना नंदुरबार जिल्हा रूग्णालयात दाखल केले.
पोलीस घटनास्थळी
दरम्यान, घटनास्थळी उपनगरचे पोलीस निरीक्षक बाळासाहेब भापकर यांनी भेट देऊन पाहणी केली. याबाबत विपेश वसंत वळवी यांनी नंदुरबार उपनगर पोलीस ठाण्यात फिर्याद दिली आहे. त्यानुसार अॅपेरिक्षा चालक अमरसिंग जेमाभाई वळवी याच्याविरुध्द विविध कलमान्वये गुन्हा दाखल करण्यात आला.
