नागपूर - राज्यात सत्ता स्थापनेचा पेच अजूनही सुटलेला नाही. अशात संकट मोचक म्हणून केंद्रीय मंत्री नितीन गडकरी आणि सरसंघचालक मोहन भागवत यांची नावे चर्चेत आली आहेत. या पार्श्वभूमीवर आज या दोघांची नागपुरात भेट होणार आहे.
'जिव्हाळा' पुरस्कार वितरण सोहळ्याच्या निमित्ताने गडकरी आणि भागवत दोघेही एका ठिकाणी येणार आहेत. या कार्यक्रमात त्यांच्यात सत्ता संघर्षाचा तिढा सोडवण्याबाबत चर्चा होण्याची दाट शक्यता आहे. त्यामुळे या कार्यक्रमाकडे सर्वांचे लक्ष लागलेले आहे.
हेही वाचा - 'ज्याच्याकडे बहुमत आहे तो सरकार बनवेल, भाजपने तसा दावा केला तर आनंदच'
दोन दिवसांपूर्वी मुख्यमंत्री देवेंद्र फडणवीस यांनी नागपूर येथील संघ मुख्यालयात जाऊन मोहन भागवत यांची भेट घेतली होती. त्यानंतर सत्तासंघर्षाचा तिढा सोडवण्यासाठी केंद्रीय मंत्री नितिन गडकरी पुढाकार घेतील, अशी चर्चा जोर धरू लागली होती. त्यातच दिल्लीमध्ये काँग्रेसच्या एका मोठ्या नेत्याने नितीन गडकरी यांची भेट घेतल्यानंतर राजकीय पंडितांच्या भुवया उंचावल्या आहेत.
